Foto: Moi gorod
Búgin, 21 tamyzda, arnaiy aýdanaralyq qylmystyq ister boiynsha sotta muǵalim Nadejda Nikitinanyń ólimine qatysty sot protsesi bastaldy, dep habarlaidy "Ult aqparat" "Moi Gorod" basylymyna silteme jasap.
Aiyptalýshy — 41 jastaǵy Temir Sarsenov. Oǵan qylmystyq kodekstiń úsh birdei baby boiynsha aiyp taǵyldy: kisi óltirý, urlyq jáne qarýdy zańsyz saqtaý. Isti sýdia Aslanbek Diýsenǵaliev qaraýda.
Is materialdaryna sáikes, aiyptalýshy 2020 jyly №9 orta mekteptiń bastaýysh synyp muǵalimi Nadejda Nikitinamen tanysqan. Sol kezde ol oqý synybyna kompiýter ornatyp jatqan. Keiin marqum birneshe ret oǵan oqý synybyndaǵy jáne úidegi tehnikalyq aqaýlardy jóndeýge kómek surap júgingen.
Osy jyldyń 24 sáýirinde Nikitina kezekti ret Sarsenovke kómek surap habarlasqan. Aiyptalýshy kelip, biraq jumysyn aiaqtamai, erteńgi kúnge ýáde bergen. 25 sáýirde Sarsenov Nikitinaǵa óziniń noýtbýgimen kelip, marqumnyń jatyn bólmesinde kompiýterdi jóndeýge kirisken. Sol kezde Nikitina as úide oqýshysymen qosymsha sabaq ótkizip jatqan.
"Oqýshyny shyǵaryp salǵannan keiin, Nikitina Sarsenovke jaqyndap, aralarynda janjal shyqqan. Sarsenov áieldi divanǵa qulatyp, onyń koftasynyń jaǵasymen tunshyqtyrǵan. Keiin pyshaqpen marqumnyń moinyna jaraqat salǵan. Nikitinanyń ólimine mehanikalyq asfiksiia sebep bolǵan", — dep prokýror aiyptaý aktisin oqydy.
Aiyptalýshy budan keiin izin jasyrý úshin urlyq jasaýdy sheshken. Ol páterden altyn buiymdar, sómke, ámiian, telefon jáne bank kartalaryn alyp ketken. Jalpy materialdyq shyǵyn 1,7 million teńgeni quraǵan.
Aita ketý kerek, Sarsenovtiń páterinen politsiia birneshe qarý men oq-dáriler tapqan, olardyń saqtaýǵa ruqsaty bolmaǵan.
Temir Sarsenov alqa bilerdiń qatysýymen sot ótkizýden bas tartty. Negizgi sot talqylaýy 27 tamyzǵa belgilendi. Aitpaqshy, sot zalynda aiyptalýshynyń sýretke jáne beinejazbaǵa túsirýge jýrnalisterge tyiym salyndy.
