Foto ©Tengrinews.kz
Shaǵan ózeni alqabyndaǵy aǵashtardyń otalýy qoǵam belsendileriniń narazylyǵyn týdyrdy. Bul másele ekologiialyq qoǵamdyq keńes otyrysynda kóterildi. 4 gektar aýmaqqa deneshynyqtyrý-saýyqtyrý keshenin salý josparlanyp jatqany belgili boldy, - dep habarlaidy Tengrinews.kz tilshisi.
"Qoǵamda ózen alqaby men sý qorǵaý aimaqtaryn igerý máselesi rezonans týdyryp otyr. Jer telimderi jekemenshikke ótip, keiin qojaiyndary aǵashtardy kesýge kirisedi. Biznestiń damýyna qarsy emespiz, biraq tabiǵatqa ziian tigizbese bolǵany. Kóp uzamai jurt demalatyn jer qalmaidy, barlyq aǵash kesilip, ýchaskeler bosamai qalady", - dedi Oral ekologiialyq-geografiialyq qoǵamdastyǵynyń tóraǵasy Darhan Sariev.
Ekologiialyq keńeste 4 gektar jer teliminiń iesi de sóz sóiledi.
"Bul jerdi 2014 jyly kottedj salý úshin satyp alǵanmyn. Endi osy jerge jabyq fýtbol alańdaryn salý ideiasy týyndady. Jazda alańdardy "Aqjaiyqtyń" jas fýtbolshylary paidalanady. Qýraǵan aǵashtardy kestik. Terekter men qaraǵashtardyń ornyna joǵary sortty aǵashtar otyrǵyzylady. Bul jobaǵa 800 million teńgege jýyq investitsiia salynady", - dedi kásipker Muńaitpas Miniýs.
Oral qalasynyń ákimdigi Shaǵan ózeni mańyndaǵy ýchaskeniń demalys aimaǵyna jatpaitynyn aitty.
"Bul orman emes, sý basqan aimaq. Sondyqtan ol jerde, sonyń ishinde sport nysandaryn salýǵa ruqsat etilgen. Jekemenshiktiń aty - jekemenshik", - dep túsindirdi Oral qalasy ákiminiń orynbasary Ashat Qulbaev.
Aita keteiik, mundai jaǵdai Oralda birinshi ret bolyp otyrǵan joq. Qala biligi 700 gektar aýmaqty Perevalochnaia orman aýmaǵynda jol salý josparyn jariialady. Bul joba da qorshaǵan ortany qorǵaý belsendileriniń narazylyǵyn týdyrdy.
