Oralda Qazaqstannyń halyq jazýshysy, aqyn Juban Moldaǵalievtiń 100 jyldyǵyna arnalǵan «Qiial qanaty» respýblikalyq dýet (poeziia men sýret) onlain baiqaýy márege jetti, dep habarlaidy "Ult aqparat".
Oblystyq halyq shyǵarmashylyǵy ortalyǵynyń direktory Máýlet Jubatovtyń aitýynsha, mundai sipattaǵy báige elimizde alǵash ret uiymdastyryldy.
«Baiqaýdyń ereksheligi, aqyn men sýretshi jup quryp, óleńi men sýretin birge báigege qosýy kerek boldy. Iaǵni jyr men boiaý kórkemdigi óz aldyna, bir-birimen úndesip turýy qajet. Qazylar alqasy da shyǵarmalardy avtorlaryn bilmesten, búrkenshik esimmen talqyǵa salyp, qorytyndysyn shyǵardy. Mundai saiysty bolashaqta da jalǵastyrý oilastyrylýda», dedi M.Jubatov.
Saiysqa elimiz óńirlerinen barlyǵy 17 dýet qatysyp, Juban aqynǵa arnalǵan óz jumystaryn báigege qosty.
Qazylar alqasynyń sheshimimen pavlodarlyqtar, aqyn Alpysbai Honj ben sýretshi Jeńis Moldabekov bas júldeni jeńip aldy.
BQO-nyń Aqjaiyq aýdanynan at qosqan aqyn Saǵyntai Bisenǵaliev pen sýretshi Daniiar Izbasarov birinshi orynǵa ie boldy. Sondai-aq batysqazaqstandyqtar, aqyn Syilyhan Jumasalyq pen sýretshi Nurtai Járdemov ekinshi júldeni enshiledi. Qaraǵandylyqtar, aqyn Janat Tilegenov pen sýretshi Ersin Temirǵaliev úshinshi orynǵa ilikti.
Batysqazaqstandyqtar, aqyn Márlen Ǵilymhan men sýretshi Arman Imashev diplomant atandy.
