Búgin Oral qalasynda Qazaqstan halyq jazýshysy, KSRO jáne Qazaqstan Memlekettik syilyǵynyń laýraty Juban Moldaǵalievtiń eskertkishi ashyldy, dep habarlaidy "Ult aqparat".
Onyń ashylý rásimine qatysqan oblys ákimi Ǵali Esqaliev qadirli meimandar men Aq Jaiyq jurtshylyǵyn Juban aqynnyń 100 jyldyq mereitoiymen quttyqtap, shynaiy tilegin bildirdi.
Ǵ.Esqaliev Memleket basshysy Qasym-Jomart Toqaevtyń quttyqtaý hatyn oqyp berdi.
«Biyl qazaqtyń aqiyq aqyny, halyq jazýshysy, Memlekettik syilyqtyń laýreaty Juban Moldaǵalievtiń týǵanyna 100 jyl tolyp otyr. Juban Moldaǵaliev – tól ádebietimizdiń kókjiegin keńeitýge ólsheýsiz úles qosqan qarymdy qalamger. Ol – ultjandylyq pen otansúigishtiktiń ozyq úlgisin kórsetip, eline adal qyzmet etken qoǵam qairatkeri. Asa kórnekti aqyn elimizdiń birqatar basylymdary men Jazýshylar odaǵyn basqaryp, ádebiet pen aqparat salasyn damytý jolynda aianbai eńbek etti. Juban Moldaǵaliev Otanǵa degen ystyq mahabbat pen erekshe súiispenshilikke toly týyndylary arqyly tutas halqymyzdyń rýhyn asqaqtatty. Ásirese, onyń «Men – qazaqpyn!» atty poemasy ulttyq ereksheligimizdi aishyqtap, qanymyzǵa sińgen asyl qasietterimizdi dáripteidi. Sondai-aq qazaqtyń namysyn janyp, eldikke shaqyrady, erlikke úndeidi. Halqymyz Juban Moldaǵalievtiń qoǵamdy damytý men ádebietimizdi órkendetýge sińirgen eńbegin eshqashan umytpaidy. El tarihynda óshpes iz qaldyrǵan birtýar tulǵanyń ónegeli ómiri óskeleń urpaqqa árdaiym úlgi bola beredi dep senemin», delingen onda.
Aqynnyń jary Sofiia Málikqyzy eńseli eskertkish ornatqan Batys Qazaqstan oblysy jurtshylyǵyna rizashylyǵyn bildirdi.
«Aq Jaiyqtan túlep ushyp, qyran bolǵan, halqyna uran bolǵan Juban aǵamyzǵa Oraldyń tórinde eskertkish ornatylýy – el ómirindegi eleýli oqiǵa. Bul osyndaǵy Syrym men Abaidyń eskertkishine serik bolyp tur, qalaǵa kórik berip tur. Bul jer urpaqtardyń táý etip, taǵzym etetin, ǵashyqtardyń gúl qoiyp keletin qasietti ornyna ainalary anyq. Bul – naizaǵai poeziiaǵa ornatylǵan eskertkish, bul – qazaqtyń ar-namysyna qoiylǵan eskertkish», dedi aqyn, Memlekettik syilyqtyń iegeri, Qazaqstan Jazýshylar odaǵynyń basqarma tóraǵasy Ulyqbek Esdáýlet.
Sonymen qatar aqyn, Memlekettik syilyqtyń iegeri Aqushtap Baqtygereeva, Qazaqstannyń Eńbek Eri, KSRO jáne Qazaqstannyń halyq ártisi Asanáli Áshimov, músinshi Serik Rýstambekov, Aqjaiyq aýdanynan el sálemin jetkizgen aqyn Saǵyntai Bisenǵaliev izgi tilekterin arnady.
Eskertkishtiń avtorlary, elordalyq músinshi-sáýletshiler – Serik Rýstambekov pen Erbol Ziiabekov. Qoladan quiylǵan eskertkishtiń biiktigi – 3,5 metr. 1,7 metrlik tuǵyrnama tabiǵi granitten jasalǵan.
Juban Moldaǵaliev pen Qadyr Myrza Álidiń mereitoilyq sharalary odan ári jalǵasýda.
