10 jeltoqsanda Oralda bir top turǵyn qala ákimi Abat Shynybekovtiń atyna jazylǵan málimdemeni ákimdikke tapsyrdy. Málimdeme avtorlary Shaǵan ózenine salynatyn jańa kópir jobasy boiynsha qoǵamdyń tyńdaýda zańbuzýshylyqtar bolǵanyn aityp, qaita tyńdaý ótkizýdi suraǵan.
Turǵyndardyń aitýynsha, uiymdastyrýshylar qatysýshylardy tirkemegen, jinalǵandarǵa kún tártibindegi tujyrymdardy usynbaǵan, tyńdaý kezinde tóraǵa men hatshy sailanbaǵan. Uiymdastyrýshylar sonymen birge otyrysty elektrondy qurylǵyǵa jazbaǵan. Turǵyndar erejege sáikes qoǵamdyq tyńdaý ótkizýdi talap etedi.
- Biz qoǵamdyq tyńdaýdy ótkizý erejesiniń úsh pýnktisi boiynsha zań buzylǵanyn anyqtadyq. Barlyq zańbuzýshylyqtar málimdemede kórsetilgen, búgin ony Oral qalasynyń ákimi Shynybekovke tapsyramyz, - dedi belsendi Asqar Shaiǵumarov.
7 jeltoqsanda Oralda Shaǵan ózeni arqyly ótetin kópir qurylysynyń jańartylǵan nusqasy tanystyrylyp, qoǵamdyq tyńdaý ótken edi. Jergilikti turǵyndar aldyńǵy joba siiaqty ony da qoldamaǵan. Keibir turǵyndar qala ortalyǵyn "Aqjaiyq" jańa shaǵyn aýdanymen qosatyn kópir qurylysy jobasy boiynsha eski zirattyń janyna jol salynatynyn aityp, shaǵymdanǵan. Keibir turǵyndar jańa magistraldyń dál úileriniń janynan ótetinin aityp, júzdegen aǵashtyń kesilýine de qarsy bolǵan. Kópir qurylysy jobasyna qarsy turǵyndar qurylysqa tyiym salý týraly petitsiia qurastyrǵan. Biraq birneshe kúnnen keiin petitsiia jabylyp qalǵan.
