10 جەلتوقساندا ورالدا بٸر توپ تۇرعىن قالا ەكٸمٸ ابات شىنىبەكوۆتٸڭ اتىنا جازىلعان مەلٸمدەمەنٸ ەكٸمدٸككە تاپسىردى. مەلٸمدەمە اۆتورلارى شاعان ٶزەنٸنە سالىناتىن جاڭا كٶپٸر جوباسى بويىنشا قوعامدىڭ تىڭداۋدا زاڭبۇزۋشىلىقتار بولعانىن ايتىپ, قايتا تىڭداۋ ٶتكٸزۋدٸ سۇراعان.
تۇرعىنداردىڭ ايتۋىنشا, ۇيىمداستىرۋشىلار قاتىسۋشىلاردى تٸركەمەگەن, جينالعاندارعا كٷن تەرتٸبٸندەگٸ تۇجىرىمداردى ۇسىنباعان, تىڭداۋ كەزٸندە تٶراعا مەن حاتشى سايلانباعان. ۇيىمداستىرۋشىلار سونىمەن بٸرگە وتىرىستى ەلەكتروندى قۇرىلعىعا جازباعان. تۇرعىندار ەرەجەگە سەيكەس قوعامدىق تىڭداۋ ٶتكٸزۋدٸ تالاپ ەتەدٸ.
- بٸز قوعامدىق تىڭداۋدى ٶتكٸزۋ ەرەجەسٸنٸڭ ٷش پۋنكتٸسٸ بويىنشا زاڭ بۇزىلعانىن انىقتادىق. بارلىق زاڭبۇزۋشىلىقتار مەلٸمدەمەدە كٶرسەتٸلگەن, بٷگٸن ونى ورال قالاسىنىڭ ەكٸمٸ شىنىبەكوۆكە تاپسىرامىز, - دەدٸ بەلسەندٸ اسقار شايعۇماروۆ.
7 جەلتوقساندا ورالدا شاعان ٶزەنٸ ارقىلى ٶتەتٸن كٶپٸر قۇرىلىسىنىڭ جاڭارتىلعان نۇسقاسى تانىستىرىلىپ, قوعامدىق تىڭداۋ ٶتكەن ەدٸ. جەرگٸلٸكتٸ تۇرعىندار الدىڭعى جوبا سيياقتى ونى دا قولداماعان. كەيبٸر تۇرعىندار قالا ورتالىعىن "اقجايىق" جاڭا شاعىن اۋدانىمەن قوساتىن كٶپٸر قۇرىلىسى جوباسى بويىنشا ەسكٸ زيراتتىڭ جانىنا جول سالىناتىنىن ايتىپ, شاعىمدانعان. كەيبٸر تۇرعىندار جاڭا ماگيسترالدىڭ دەل ٷيلەرٸنٸڭ جانىنان ٶتەتٸنٸن ايتىپ, جٷزدەگەن اعاشتىڭ كەسٸلۋٸنە دە قارسى بولعان. كٶپٸر قۇرىلىسى جوباسىنا قارسى تۇرعىندار قۇرىلىسقا تىيىم سالۋ تۋرالى پەتيتسييا قۇراستىرعان. بٸراق بٸرنەشە كٷننەن كەيٸن پەتيتسييا جابىلىپ قالعان.
