Oralda 5517-áskeri bólim jaýyngeri Isa Nurǵaliev jol apatyna túsken júrgizýshige meditsinalyq járdem kórsetip, qutqaryp qaldy, dep habarlaidy QazAqparat.
QR Ulttyq ulany «Batys» óńirlik qolbasshylyǵy baspasóz qyzmetiniń bastyǵy, podpolkovnik Erbolat Sultanovtyń málim etkenindei, oqiǵa 11 qyrkúiek kúni saǵat 19.30 shamasynda «Oral» halyqaralyq áýejaiy mańynda boldy.
Úlken jyldamdyqpen kele jatqan «VAZ-2114» avtokóliginiń júrgizýshisi rýlge ie bola almai, sonyń saldarynan birneshe ret aýdarylyp túsken. Júrgizýshi avtokólikke qystyrylyp qalyp, ózdiginen shyǵa almaǵan.
Sol sátte 5517-áskeri bólim komandiriniń orynbasary, maior Mels Dýlatbaev pen kelisimshartpen qyzmet etetin áskeri bólim meditsinalyq pýnktiniń mamany, qatardaǵy jaýynger Isa Nurǵaliev «Suńqar» oqý ortalyǵynan qaityp kele jatqan. Olar oqiǵa ornyna shuǵyl jetip, qystyrylyp qalǵan er adamdy bosatyp alǵan. Sodan keiin Isa Nurǵaliev jedel járdem kelgenge deiin zardap shegýshige alǵashqy dárigerlik kómek kórsetken.
«Júrgizýshi ashyq bas-mi jaraqatyn alyp, edáýir qan joǵaltqan eken, qan qysymy da tómen boldy. Qiyn jaǵdaida qalǵan adamǵa járdem berý bárimizdiń boryshymyz dep bilemin», dedi Isa Nurǵaliev.
Adam ómirin qutqarý kezinde kórsetken kásibi qyzmeti úshin I.Nurǵaliev «Batys» óńirlik qolbasshysyna yntalandyrýǵa usynyldy.
«Qazirgi kezde jaraqat alǵan júrgizýshi oblystyq aýrýhanada jatyr, jaǵdaiy ortasha», dedi E. Sultanov.
