Oralda 17 jastaǵy qyz sýǵa batyp ketken, - dep habarlaidy "Moi GOROD". Oqiǵa 6 shildede bolǵan. Marqum týystarymen birge shomylýǵa kelgen. Olar týǵan kún toilap jatqan.
"Eki qyz sýǵa batty. Bireýin ákesi qutqardy, ony jaǵalaýǵa alyp shyqty. Sosyn ol ekinshisin qutqarýǵa tyrysty. Biraq sý óte tereń. Men de sýǵa súńgidim, biraq qyzdyń denesin tappai qaldyq", - dedi "Svetliachok" týrbazasynyń qyzmetkeri.
Oqiǵa ornyna BQO TJD jedel qutqarý qyzmetkerleri kelgen. "Derqul ózeninen BQO TJD qyzmetkerleri 1999 jylǵy qyzdyń denesin alyp shyqty. Máiit týystaryna tapsyryldy", - dedi vedomstvonyń baspasóz hatshysy Nurgúl Muqanova.
Qaitys bolǵan 17 jastaǵy Rabiǵa Baimuratovanyń týystary qyzdyń Jánibek aýdanynan Mahambet Ótemisuly atyndaǵy Batys Qazaqstan ýniversitetine oqýǵa túsýge kelgenin aityp berdi. Rabiǵa UBT-dan 120 ball jinaǵan, ol jýrnalist bolýdy armandapty.
"Biz "Svetliachok" týrbazasynyń basshylyǵyn kinálap otyrmyz. Olar aqsha alyp, demalysty uiymdastyrady. Al jaǵalaýda nelikten qutqarýshylar bolmaǵan? Shomylý orny tormen qorshalmaǵan", - dedi qaitys bolǵan qyzdyń aǵasy.
Al "Svetliachok" týrbazasynyń direktory óz kezeginde jaǵalaýdyń resmi emes ekenin jáne óz territoriiasyna jatpaitynyn málimdedi.
"Ózenge qalaǵan adam túse alady. Qoǵamdyq jaǵalaý bul. Ony qorshaǵymyz kelgen, biraq saiajai turǵyndary qarsy boldy. Biz úishikter men palatkalardy ǵana jalǵa aldyq. Bul jaǵalaýdy resmi tirkegenin biz de qalaimyz, sonda ǵana bul jerde qutqarýshylar bolatyn edi, jaǵalaýdy taza ustaityn edik. Biraq bizge bul jerdi jalǵa bermeidi. Qaza tapqan qyzdyń týystaryna kóńil aitamyz", - dedi týrbazanyń direktory Kenjebulat Túsipaliev.
