foto: 24.kz
Oral qalasynda turǵyndar taraqannyń dárisinen ýlanyp qaldy. Ziiandy preparattan zardap shegip, kómeiin kúidirgen 5 azamat jedel járdemge júgingen, - dep habarlaidy "Ult aqparat" 24.kz arnasyna silteme jasap.
Mamandar "keleshekte osyndai oqiǵalar qaitalanbas úshin ýlaý jumystarymen ainalysatyn uiymdardy qadaǵalaý qajet" deidi. Dezinfektsiialyq preparattardyń satylymyn shekteý kerek.
Vokzal tuiyǵy kóshesindegi 5 qabatty úiden jedel járdemge qońyraý tún ortasynda túsken. Turǵyndar belgisiz iisten ýlanyp qalǵandaryn habarlapty. Aýrýhanaǵa shuǵyl jatqyzylǵan 5 adamnyń kómeiin kúidirgeni anyqtalyp, tiisti kómekten keiin kelesi kúni úiden emdelýge jiberilgen.
"5 jasar qyzym ádette erte jatpaityn edi. Sol kúni óz-ózinen álsirep, uiqysy keldi. Ózimniń de qulaǵym shýyldap, kúdiktene bastadym. Sóitkenshe bolǵan joq esik qaqty ǵoi. Dárigerler eken, "ýly zat tarap jatyr, tez shyǵyńdar", - dep kelip turǵan. Sodan aýlada tekserilgen soń, aýrýhanaǵa alyp ketti. Men de, qyzym da kómeiimizdi kúidirippiz. Áli óz-ózime kele almai júrmin", - deidi turǵyn Nadejda Shvakova.
Turǵyndardyń ýlanýyna 2 qabattaǵy kórshisi kináli bolyp shyqty. Túngi 11-de taraqandarǵa soǵys ashqan sabazyń tútin salatyn preparat qoldanǵan. Ýly dárini shekaranyń ar jaǵynan internet dúken arqyly tapsyryspen aldyrypty. Jalpy mundai preparattyń qaýiptiligi 2-klasqa jatady. Al turǵyndar ózdikterinen 3-4 klasty preparattardy ǵana qoldanýǵa bolatyn kórinedi. Onda da kórshilerin eskertip, barlyq saqtyq sharalaryn umytpaýy kerek.
"Halyqqa aitarymyz eger de úilerdi belgisiz zatpen ýlaýǵa jol berilmeidi. Bul jumysty atqarý úshin belgili bir litsenziiasy bar arnaiy mekemege júginýińizdi suraimyz. Sebebi osyndai mekemelerde arnaiy priborlar, oqytylǵan mamandar, jeke qorǵanys quraldary bolady", - deidi oblystyq sanitarlyq-epidemiologiialyq baqylaý departamenti basshysynyń orynbasary Gúldana Kereeva.
Buryn dezinfektsiialyq-deratizatsiialyq jumyspen ainalysatyn mekemeler epidemiialyq máni bolmashy nysandar qatarynda bolǵasyn, oblystyq tazalyq-indet basqarmasyna habarlama jiberýmen shekteletin. Alaida sońǵy jyldary osyndai oqys oqiǵalar jiilep ketýine bailanysty quqyqtyq-normativtik aktilerge tiisti ózgerister engizilip, endi bul uiymdardyń qyzmeti litsenziialanýy tiis.
"2024 jyldyń shildesinen bastalady litsenziialaý. Oǵan jarty jyl beriledi. Bul durys dep sanaimyn. Sebebi qazir telefonmen tapsyrys qabyldap, ýdy bazardan satyp alyp, eshqandai arnaiy oqýsyz osy qyzmetpen ainalysatyndar kóbeiip ketti. Biraq qaýip bunymen seiilmeidi. Bizderde 1-2 klasty dezinfektsiialyq ziiandy preparattar erkin satylyp jatyr. Soǵan shekteý qoiý kerek", - deidi dezinfektsiialaýshy mekeme direktory Iýliia Maier.
Aita keterligi, óńirde himiialyq zatpen ýlanǵan osyndai oqys oqiǵa birinshi ret tirkelipti. Mamandar mundai jaǵdaidy bolashaqta boldyrmaý úshin páterlerde dezinsektsiia, deratizatsiia jáne dezinfektsiia sharalaryn ózdikterinen júrgizbeýdi, bilikti mamandardyń keńesine júginýdi suraidy.
