Oralda toi kortejinde «oq atqan» jigit ustaldy, dep habarlaidy "Ult aqparat".
Áleýmettik jelide taralǵan videodan kóringenindei, toi kortejinde júrgen jas jigit kóshe qiylysynda avtokóliginen shyǵyp, aýaǵa eki márte ot atqan.
BQO politsiia departamentiniń baspasóz qyzmetinen túsken málimetke qaraǵanda, oqiǵa 20 qarasha kúni Saltanat saraiy mańynda oryn alǵan. 102 telefonyna «VAZ-2115» avtokóliginen shyqqan belgisiz bireýdiń aýaǵa oq atqany jóninde qońyraý shalynǵan.
Sh. esimdi 20 jasar júrgizýshi sol boida ustalyp, kólikten tapanshaǵa uqsas zat alyndy. Saraptama qorytyndysyna sáikes Túrkiiadan shyǵarylǵan «RETAY-Baron» tapanshasy atys qarýy bolyp tabylmaidy.
Degenmen atalǵan azamatqa qatysty QR Ákimshilik quqyqbuzýshylyq kodeksi 434-baby 1-bóligine sáikes (usaq buzaqylyq) ákimshilik is qozǵaldy.
Sonymen qatar júrgizýshiniń qujatyn teksergen kezde onyń jol-kólik oqiǵasy bolǵan jerden ketip qalǵany úshin mamandandyrylǵan ákimshilik sotynyń biylǵy 23 qyrkúiektegi qaýlysymen 1 jylǵa kólik quralyn basqarý quqyǵynan aiyrylǵany anyqtaldy.
Avtokólik arnaiy turaqqa qoiyldy.
Júrgizýshige qatysty QR Ákimshilik quqyqbuzýshylyq kodeksi 612-baby 3-bóligine sáikes (qujattary joq jáne basqarý quqyǵy joq adamnyń kólik quralyn basqarýy) ákimshilik is qozǵaldy.
