Oralda kóńil kótermekshi bolǵan 27 jastaǵy turǵyndy bireýler uryp-soǵyp, tonap ketti, dep habarlaidy "Ult aqparat".
BQO politsiia departamentiniń baspasóz qyzmeti málim etkenindei, jigit kóńil kóterý oryndarynyń birinde tanysqan qyzdy úiine shaqyrady.
Ile-shala qyzben tanys eki er adam keledi. Múmkindikti qur jibermegen qyz esikti ashady.
Kúdiktiler jábirlenýshige dene jaraqattaryn keltirip, onyń 1 mln teńge turatyn noýtbýk, telefony men altyn buiymdaryn jymqyryp ketedi.
Qyzdyń aty-jónin ǵana bilgen politsiia qyzmetkerleri qylmysqa qatysy bar adamdardyń bárin anyqtady. Olar Atyraý oblysynyń turǵyndary bolyp shyqty.
Atyraýǵa dereý jol tartqan politseiler úsh kúdiktini jalǵa alǵan páterinde jasyrynyp otyrǵan jerinen qolǵa túsirdi.
Qazirgi kezde osy oqiǵa boiynsha tergeý amaldary júrgizilýde.
