Oral qalalyq sotynda Oral qalasy memlekettik kirister basqarmasynyń burynǵy basshysy Nurlan Alhievke qatysty úkim shyqty, dep habarlaidy "Ult aqparat".
BQO sotynyń baspasóz qyzmetinen túsken málimetke qaraǵanda, N.Alhiev QR QK 366-baby 2-bóligine sáikes aiypty dep tanylyp, oǵan paranyń 55 eselengen kóleminde, iaǵni 23 mln 650 myń teńge kóleminde aiyppul salyndy.
Ol sonymen qatar memlekettik qyzmette, sotta, jergilikti ózin-ózi basqarý organdarynda qyzmet atqarý quqyǵynan ómir boiyna aiyryldy.
Sot talqysynda málim bolǵanyndai, biylǵy 18 qańtarda QR Qarjy ministrligi Memlekettik kirister komitetinen Oral qalasy memlekettik kirister basqarmasy men «SaýdaEt» JShS-yna atalǵan seriktestikke qatysty kameraldyq baqylaý nátijeleri boiynsha anyqtalǵan buzýshylyqtar jóninde habarlama jiberilgen.
N.Alhiev JShS quryltaishysy A.Sletadan seriktestiktiń banktik shoty boiynsha shyǵys operatsiialaryn toqtatý jónindegi shekteý sharalaryn alyp tastaý úshin 1 myń AQSh dollary kóleminde para talap etken. Sleta sol kúni 430 myń teńge bergen.
Birneshe kún ótkennen keiin N.Alhiev atalǵan seriktestiktiń «Sleta A.A.» jeke kásipkerliginiń 2019-2020 jyldardaǵy ónim jetkizýshisi bolǵandyqtan, shekteýlerdi alyp tastaý ózin jaýapkershilikke tartýǵa ákelip soǵatynyn túsingen. Naýryz aiynyń ortasynda ol Sletaǵa shekteýlerdi alyp tastai almaitynyn, sondyqtan 430 myń teńge kólemindegi parany keri qaitaratynyn aitqan.
N.Alhiev 16 naýryzda 1 myń AQSh dollaryn keri qaitarǵannan keiin BQO boiynsha sybailas jemqorlyqqa qarsy qyzmet qyzmetkerleriniń qolyna túsken.
Sot úkimi kúshine engen joq.
