BQO qylmystyq ister jónindeni mamandandyrylǵan aýdanaralyq sotynda Raiymbek Serikov, Alpamys Násipqaliev jáne Aidos Baianǵalievke qatysty úkim shyqty, dep habarlaidy "Ult aqparat".
Sýdia Shara Zainýllinanyń málim etkenindei, R.Serikov Qylmystyq kodekstiń 24-baby 3-bóligi, 99-baby 2-bóligi 9-tarmaǵymen (buzaqylyq nietpen adam óltirýge oqtalý), 293-baby 3-bóligi 2-tarmaǵymen, 58-baby 4-bóligimen (aldyn ala sóz bailasý arqyly adamdar toby bolyp, azamattarǵa kúsh jáne atys qarýyn qoldanyp buzaqylyq jasaý), 60-bap negizinde 15 jyl 2 ai merzimge bas bostandyǵynan aiyrý jazasyn qaýipsizdigi tótenshe qylmystyq-atqarý júiesi mekemesinde óteýge sottaldy.
A.Násipqaliev QR QK-niń 293-baby 3-bóligi 2-tarmaǵymen (aldyn ala sóz bailasý arqyly adamdar toby bolyp, azamattarǵa kúsh jáne atys qarýyn qoldanyp buzaqylyq jasaý) aiypty dep tanylyp, 3 jyl 6 aiǵa bas bostandyǵynan aiyrý jazasyn qaýipsizdigi ortasha qylmystyq-atqarý júiesi mekemesinde óteýge kesildi.
A.Baianǵalievke QR QK-niń 293-baby 2-bóligi 1-tarmaǵyna (aldyn ala sóz bailasý arqyly adamdar toby bolyp, azamattarǵa kúsh qoldanyp buzaqylyq jasaý) sáikes 2 jyl 6 aiǵa bas bostandyǵy shektelip, probatsiialyq baqylaý ornatyldy.
Sot tergeýinde anyqtalǵanyndai, ótken jyly 20 qazanda saǵat 21.30 shamasynda «Beloe solntse» meiramhanasy janyndaǵy saida sottalýshylar men jábirlenýshiler kezdesken. Sol jerde A.Násipqaliev myltyqpen úsh ret aspanǵa oq atqanda, jábirlenýshiler jan-jaqqa qasha jónelgen. A.Násipqaliev pen A.Baianǵaliev jábirlenýshi Sh.Quljanovty qýyp jetip, soqqyǵa jyqqan. Al R.Serikov A.Násipqalievten myltyqty alyp, tergeý anyqtamaǵan bir top adamǵa baǵyttap, úsh márte oq atqan.
Sosyn qashyp bara jatqan topty qýyp, «Kompot» ashanasynyń tusynda adam óltirý maqsatynda jábirlenýshi K.Abitovty bir márte atyp, onyń sol jaq búiirin jaraqattaǵan.
K.Abitov jaraqattanǵan kúii «Kompot» ashanasy artyndaǵy «Plit Servis» JShS aýlasyna qarai qashqan. R.Serikov taǵy bir márte oq atqanymen, tigize almaǵan. K.Abitov kúzetshiniń býdkasyna kirip, tyǵylǵan. R.Serikov myltyǵyn taǵy da oqtap, aýladan K.Abitovti izdegenimen, taba almaǵan.
Sottalýshylar A.Násipqaliev pen A.Baianǵaliev taǵylǵan aiypty tolyq moiyndady. R.Serikov ishinara moiyndap, jábirlenýshini óltirý emes, qorqytý maqsatynda oq atqanyn málimdedi.
Sottalýshylardyń kinási olardyń sotqa deiingi jáne sotta bergen, sondai-aq jábirlenýshilerdiń, kýálardyń jaýabymen, oqiǵa ornyn qarap tekserý hattamalarymen, sot-meditsinalyq saraptama qorytyndylarymen, sot talqylaýynda qaralǵan «Plit Servis» JShS-nyń syrtynda ornalasqan kameranyń beinetaspasy jáne basqa da is materialdarymen dáleldengen.
Prokýrordyń talap aryzy boiynsha jábirlenýshi K.Abitovtiń statsionarlyq emine jumsalǵan 278 384,24 teńge R.Serikovten tolyqtai óndirildi.
Sot úkimi zańdy kúshine engen joq.
