Oralda modýldik juqpaly aýrýlar aýrýhanasy paidalanýǵa berildi, dep habarlaidy "Ult aqparat".
Jańa nysannyń ashylý rásimine qatysqan oblys ákimi Ǵali Esqaliev ótken jyldyń koronavirýs indetimen kúres jyly retinde este qalatyndyǵyn atap ótti.
Onyń sózine qaraǵanda, 2020 jyldyń qanshalyqty qiyn bolǵanyn meditsina qyzmetkerleri jaqsy biledi. Olar ýaqytpen sanaspai, eki-úsh aýysym boiy eńbek etti.
Soǵan qaramastan, indet halqymyzǵa aýyr tidi. Naýqastar úshin oryn jetpei, kútip qalǵan ýaqyttar boldy.
Tiisti qural-jabdyqtar men meditsina qyzmetkerleriniń tapshylyǵy sezildi. Óńirde 500-ge jýyq meditsina qyzmetkeri indetke shaldyǵyp, tórt dáriger ómirden ozdy.
«Indetke búkil álem, eldegi infraqurylym daiyn bolǵan joq. Sondyqtan Memleket basshysy Úkimetke óńirlerde qysqa merzimde modýldik aýrýhanalar salý jóninde tapsyrma berdi. Sonyń nátijesinde, mine, quny 7,2 mlrd teńge turatyn modýldik aýrýhana boi kóterdi. 140 oryndyq oblystyq juqpaly aýrýlar aýrýhanasynyń ǵimaraty 1964 jyly salynǵan. Jańa ǵimarat salý qajettigi týyndap júrgen. 200 oryndyq modýldik aýrýhana sanitarlyq talaptarǵa sai, barlyq kerek-jaraqtarmen qamtamasyz etilgen», dedi Ǵ.Esqaliev.
Óńir basshysy qaýiptiń áli seiilmegenin, sol sebepti turǵyndardyń da óz densaýlyǵyna jaýapkershilikpen qarap, shekteý sharalaryn buljytpai saqtaýy kerektigin jetkizdi.
Indetke shaldyqqandardy emdeýge arnalǵan modýldik aýrýhanada barlyǵy 200 tósek bolsa, sonyń 20-sy – jansaqtaý oryndary. «Juldyz» shaǵynaýdanynda 4 gektardan astam jerdi alyp jatqan aýrýhananyń jalpy alańy – 6800 sharshy metr.
Eske sala keteiik, budan buryn Oralda modýldik juqpaly aýrýlar aýrýhanasynyń qurylysy aiaqtalǵanyn, Batys Qazaqstanda 180-ge jýyq adamnyń juqpaly aýrýlar statsionarynda jatqanyn jazǵan edik.
