ورالدا مودۋلدٸك جۇقپالى اۋرۋلار اۋرۋحاناسى پايدالانۋعا بەرٸلدٸ, دەپ حابارلايدى "ۇلت اقپارات".
جاڭا نىساننىڭ اشىلۋ رەسٸمٸنە قاتىسقان وبلىس ەكٸمٸ عالي ەسقاليەۆ ٶتكەن جىلدىڭ كوروناۆيرۋس ٸندەتٸمەن كٷرەس جىلى رەتٸندە ەستە قالاتىندىعىن اتاپ ٶتتٸ.
ونىڭ سٶزٸنە قاراعاندا, 2020 جىلدىڭ قانشالىقتى قيىن بولعانىن مەديتسينا قىزمەتكەرلەرٸ جاقسى بٸلەدٸ. ولار ۋاقىتپەن ساناسپاي, ەكٸ-ٷش اۋىسىم بويى ەڭبەك ەتتٸ.
سوعان قاراماستان, ٸندەت حالقىمىزعا اۋىر تيدٸ. ناۋقاستار ٷشٸن ورىن جەتپەي, كٷتٸپ قالعان ۋاقىتتار بولدى.
تيٸستٸ قۇرال-جابدىقتار مەن مەديتسينا قىزمەتكەرلەرٸنٸڭ تاپشىلىعى سەزٸلدٸ. ٶڭٸردە 500-گە جۋىق مەديتسينا قىزمەتكەرٸ ٸندەتكە شالدىعىپ, تٶرت دەرٸگەر ٶمٸردەن وزدى.
«ٸندەتكە بٷكٸل ەلەم, ەلدەگٸ ينفراقۇرىلىم دايىن بولعان جوق. سوندىقتان مەملەكەت باسشىسى ٷكٸمەتكە ٶڭٸرلەردە قىسقا مەرزٸمدە مودۋلدٸك اۋرۋحانالار سالۋ جٶنٸندە تاپسىرما بەردٸ. سونىڭ نەتيجەسٸندە, مٸنە, قۇنى 7,2 ملرد تەڭگە تۇراتىن مودۋلدٸك اۋرۋحانا بوي كٶتەردٸ. 140 ورىندىق وبلىستىق جۇقپالى اۋرۋلار اۋرۋحاناسىنىڭ عيماراتى 1964 جىلى سالىنعان. جاڭا عيمارات سالۋ قاجەتتٸگٸ تۋىنداپ جٷرگەن. 200 ورىندىق مودۋلدٸك اۋرۋحانا سانيتارلىق تالاپتارعا ساي, بارلىق كەرەك-جاراقتارمەن قامتاماسىز ەتٸلگەن», دەدٸ ع.ەسقاليەۆ.
ٶڭٸر باسشىسى قاۋٸپتٸڭ ەلٸ سەيٸلمەگەنٸن, سول سەبەپتٸ تۇرعىنداردىڭ دا ٶز دەنساۋلىعىنا جاۋاپكەرشٸلٸكپەن قاراپ, شەكتەۋ شارالارىن بۇلجىتپاي ساقتاۋى كەرەكتٸگٸن جەتكٸزدٸ.
ٸندەتكە شالدىققانداردى ەمدەۋگە ارنالعان مودۋلدٸك اۋرۋحانادا بارلىعى 200 تٶسەك بولسا, سونىڭ 20-سى – جانساقتاۋ ورىندارى. «جۇلدىز» شاعىناۋدانىندا 4 گەكتاردان استام جەردٸ الىپ جاتقان اۋرۋحانانىڭ جالپى الاڭى – 6800 شارشى مەتر.
ەسكە سالا كەتەيٸك, بۇدان بۇرىن ورالدا مودۋلدٸك جۇقپالى اۋرۋلار اۋرۋحاناسىنىڭ قۇرىلىسى اياقتالعانىن, باتىس قازاقستاندا 180-گە جۋىق ادامنىڭ جۇقپالى اۋرۋلار ستاتسيونارىندا جاتقانىن جازعان ەدٸك.
