Foto: QR TJM
Oralda mekteptegi órt kezinde gazdan ýlanǵan kúzetshi aýrýhanaǵa tústi, dep habarlaidy QazAqparat.
BQO politsiia departamentiniń baspasóz qyzmetinen málim etkendei, oqiǵa 31 qańtarǵa qaraǵan túni D.Qonaev shaǵynaýdanynda bolǵan.
«Saǵat 00.05-te TJ departamentinen №28 mekteptiń ekinshi qabaty tútindep jatqany jóninde habar túsken. Politsiia qyzmetkerleri kelgen kezde synyptaǵy elektr qalqannyń tuiyqtalǵany anyqtaldy. Órtti sóndirmek bolǵan atalǵan mekteptiń kúzetshisi gazdan ýlanǵan. Keiin ol qalalyq aýrýhanaǵa jetkizildi. Kúzetshi gazdan ýlanǵan degen diagnozben jansaqtaý bóliminde jatyr», dep habarlady vedomstvodan.
BQO TJ departamenti baspasóz qyzmetiniń naqtylaýynsha, 30 qańtar kúni saǵat 23.59-da 1992 jyly salynǵan №28 mektep-litseidiń ekinshi qabatyndaǵy №45 oqý kabinetinde jihaz jandy.
Órt aýmaǵy 15 sharshy metrdi qamtydy. Órt ornynan №48 oqý kabineti aldynan mektepte kúzetshi bolyp jumys isteitin 1957 jylǵy er adam tabyldy.
Oǵan alǵashqy kómek kórsetilip, qalalyq kópbeiindi aýrýhananyń jansaqtaý bólimine jatqyzyldy.
Gazdan ýlanǵan kúzetshiniń jaǵdaiy aýyr. Órt saǵat 00.37-de oqshaýlanyp, 00.40-ta tolyqtai sóndirildi.
