ورالدا مەكتەپ ٶرتەنٸپ, گازدان ۋلانعان كٷزەتشٸ اۋرۋحاناعا تٷستٸ

فوتو: قر تجم 

ورالدا مەكتەپتەگٸ ٶرت كەزٸندە گازدان ۋلانعان كٷزەتشٸ اۋرۋحاناعا تٷستٸ, دەپ حابارلايدى قازاقپارات.

بقو پوليتسييا دەپارتامەنتٸنٸڭ باسپاسٶز قىزمەتٸنەن مەلٸم ەتكەندەي, وقيعا 31 قاڭتارعا قاراعان تٷنٸ د.قوناەۆ شاعىناۋدانىندا بولعان.

«ساعات 00.05-تە تج دەپارتامەنتٸنەن №28 مەكتەپتٸڭ ەكٸنشٸ قاباتى تٷتٸندەپ جاتقانى جٶنٸندە حابار تٷسكەن. پوليتسييا قىزمەتكەرلەرٸ كەلگەن كەزدە سىنىپتاعى ەلەكتر قالقاننىڭ تۇيىقتالعانى انىقتالدى. ٶرتتٸ سٶندٸرمەك بولعان اتالعان مەكتەپتٸڭ كٷزەتشٸسٸ گازدان ۋلانعان. كەيٸن ول قالالىق اۋرۋحاناعا جەتكٸزٸلدٸ. كٷزەتشٸ گازدان ۋلانعان دەگەن دياگنوزبەن جانساقتاۋ بٶلٸمٸندە جاتىر», دەپ حابارلادى ۆەدومستۆودان.

بقو تج دەپارتامەنتٸ باسپاسٶز قىزمەتٸنٸڭ ناقتىلاۋىنشا, 30 قاڭتار كٷنٸ ساعات 23.59-دا 1992 جىلى سالىنعان №28 مەكتەپ-ليتسەيدٸڭ ەكٸنشٸ قاباتىنداعى №45 وقۋ كابينەتٸندە جيھاز جاندى.

ٶرت اۋماعى 15 شارشى مەتردٸ قامتىدى. ٶرت ورنىنان №48 وقۋ كابينەتٸ الدىنان مەكتەپتە كٷزەتشٸ بولىپ جۇمىس ٸستەيتٸن 1957 جىلعى ەر ادام تابىلدى.

وعان العاشقى كٶمەك كٶرسەتٸلٸپ, قالالىق كٶپبەيٸندٸ اۋرۋحانانىڭ جانساقتاۋ بٶلٸمٸنە جاتقىزىلدى.

گازدان ۋلانعان كٷزەتشٸنٸڭ جاعدايى اۋىر. ٶرت ساعات 00.37-دە وقشاۋلانىپ, 00.40-تا تولىقتاي سٶندٸرٸلدٸ.