Oralda koronavirýs juqtyrǵan toǵyzynshy naýqas meditsina qyzmetkeri bolyp shyqty. Bul týraly brifingte BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵali Aryspaev málim etti, dep habarlaidy "Ult aqparat".
Onyń aitýynsha, 49 jastaǵy medbike «Kýmyska» provizorlyq statsionarynda jumys isteidi.
Koronavirýsqa shaldyqqan adamdarmen bailanysta bolǵannan keiin medbikeden bastapqyda 9 sáýir kúni alynǵan zerthanalyq synama teris nátije kórsetken. Alaida 12 sáýir kúni taǵy da synama alynǵan kezde onyń koronavirýspen aýyrǵany anyqtalyp, naýqas oblystyq juqpaly aýrýlar aýrýhanasyna jeke boksqa jatqyzyldy.
Jaǵdaiy qanaǵattanarlyq, em qabyldaýda.
Naýqaspen jumys ornynda tikelei qarym-qatynasta bolǵan 7 adamnan synama alyndy. Onyń altaýynan aýrý anyqtalǵan joq. Bireýiniń qorytyndysy áli shyqqan joq.
Sonymen meditsina qyzmetkeri turǵan «Qurylysshy» shaǵynaýdanyndaǵy úidiń kireberisine karantin qoiylyp, naýqastyń páteri men sol mańǵa tiisti dezinfektsiia jumystary júrgizildi.
«Oǵan qosa «Kýmyska» statsionarynda karantin ornatylyp, ondaǵy barlyq emdelýshilerdiń kirip-shyǵýyna tyiym salyndy. Naýqaspen bailanysta bolǵan jeti adam da karantinde. Basqa aýysymda bolǵan qyzmetkerler de tekserilip jatyr», dedi M.Aryspaev.
Onyń sózine qaraǵanda, boljam boiynsha atalǵan meditsina qyzmetkeri qorǵanys quraldaryn durys paidalanbaǵan. Munyń bári anyqtalý ústinde.
Oblystyq densaýlyq saqtaý basqarmasynyń basshysy Bolatbek Kaiýpov naýqastarmen aldyńǵy shepte jumys istep júrgen meditsina qyzmetkerlerimen qosymsha nusqaý sharasy júrgizilgenin, turǵyndardyń da saqtyqty umytpaýy kerektigin jetkizdi.
Eske sala keteiik, buǵan deiin 49 jastaǵy virýs juqtyrǵan naýqas, provizorlyq statsionarda medbike bolyp jumys isteitini týraly www.coronavirus2020.kz saitynyń resmi telegram arnasynda habarlanǵan bolatyn.
