Oralda qurylysy aiaqtalmaǵan úidiń jertólesinen sábi tabyldy. Qazir politsiia qyzmetkerleri tastandy balanyń anasyn izdep jatyr, dep habarlaidy "Ult aqparat" BNews.kz portalyna silteme jasap.
Salynyp jatqan úi №24 orta mektep janynda ornalasqan. Ǵimaratty aralap júrgen kúzetshi Nikolai Plotnikov jylaǵan balanyń daýysyn estidi. Ol jertólege kireberis jerde jatyr eken.
«Balanyń beti dákemen jabylǵan. Aýzynda emizigi bar. Men birden ainaladamdaǵy adamdardy shaqyrdym. Politsiia men jedel járdemge de qońyraý shaldym», - dedi kúzetshi.
Politsiia qyzmetkerleriniń aitýynsha, bala shamamen bir jarym ailyq. Kiimi men denesi taza, kútimi jaqsy bolǵan.
«Oqiǵa oryn alǵan jerge tergeý tobyn shaqyrdyq. Kinologtar itpen jumys istep jatyr. It adamdardy kórshi úige apardy. Politseiler tastandy balanyń anasyn tabý úshin barlyq páterdi tekserip shyǵady», - dep málimdedi Oral qalasy IIB jergilikti politsiia qyzmetiniń bastyǵy Músilim Járdemov.
Politseiler balanyń týystaryn tabýǵa kómektesý úshin qala turǵyndaryna ótinish bildirdi. Kez kelgen aqparatty 102 nómirine qońyraý shalyp aitýǵa bolady. Meditsina qyzmetkerleri balanyń densaýlyǵy jaqsy dep otyr. Qazir ol oblystyq balalar aýrýhanasyna jetkizildi.
