Búgin Oralda Jeńis kúni qarsańynda «Túrkistan» shaǵyn kúzet kemesi Shaǵan ózeninde sýǵa túsirildi, dep habarlaidy "Ult aqparat".
QR UQK Shekara qyzmetiniń tapsyrysyna sáikes «Aibar» jobasy aiasynda «Qazaqstan injiniring» UK» AQ-ǵa qarasty Oraldaǵy «Zenit» zaýytynda qurastyrylǵan 27-inshi keme Jaiyq ózeni arqyly Kaspii teńizine jol tartady.
Saltanatty rásimge qatysqan oblys ákimi Ǵali Esqaliev atap ótkendei, «Oral «Zenit» zaýyty» AQ teńiz kúzetine arnalǵan keme-katerlerdi 1993 jyldan beri jasap keledi.
Sý yǵystyrylymy 70 tonnadai «Túrkistan» kemesi saǵatyna 70 shaqyrym jyldamdyqpen júze alady. Ol teńiz daýylyna da tótep beredi.
Aldaǵy ýaqytta «Zenit» zaýytynda sý yǵystyrylymy budan 10 ese úlken kemeni qurastyrý josparlanýda.
QR UQK Shekara qyzmeti basqarmasynyń basshysy Sabyr Hasanov buǵan deiin «Zenit» zaýytynan shyǵarylǵan korablder sekildi, «Túrkistan» kemesiniń de kóp uzamai teńizdegi shekara kúzetine kirisetinin jetkizdi.
