Oral qalasynda JaiyqFilmFest halyqaralyq qysqametrajdy jáne derekti filmder kinofestivali ótip jatyr, dep habarlaidy QazAqparat.
Kinofestival QR Táýelsizdiginiń 30 jyldyǵy aiasynda jáne «Qala kúni» merekesine orai uiymdastyrylǵan.
Festivalǵa qatysý úshin álemniń túpkir túpkirinen 100den asa ótinim kelip túsken. Sonyń ishinen 9 memleketten 31 film ádilqazylar alqasyna usynyldy.
Qazylar alqasynyń quramynda Merýet Ótekeshova, Samal Esliamova, Altynai Nógerbek, Erlan Nurmuhambet, Jeńishan Momyshev, Talǵat Taishanov, Aigýl Cherendina, Aslanbek Gýbashev syndy kino áleminiń maitalmandary bar.
Sondai-aq festival aiasynda jas kino súier qaýym úshin Dariǵa Badykova men Ramazan Amantaidyń sheberlik sabaqtary ótkizildi.
«Aktermen birge» festival aiasynda «Anaǵa aparar jol» kinokartinasyn kópshilik filmde basty róldi somdaǵan Altynai Nógerbekpen birge kórdi.
Sonymen qatar, festivaldiń ashylý saltanatynda Sh.Aimanov atyndaǵy «Qazaqfilm» AQ men Tokyo New Cinema túsirgen, «Konokrady. Ýaqyt joldary» filminiń tusaýkeseri ótti.
Filmniń rejisserleri - Erlan Nurmuhambetov (Qazaqstan) jáne Liza Takeba (Japoniia). Foto rejisseri: Aziz Jambakiev (Qazaqstan).
Rólderde: Dýlyǵa Aqmolda (Qazaqstan), Samal Esliamova (Qazaqstan), Mirai Moriiama (Japoniia), Madi Minaidarov (Qazaqstan) jáne t.b.
Film osyǵan deiin 2019 jyly 24-shi Pýsan halyqaralyq kinofestivaliniń ashylý saltanatynda kórsetilgen.
- Jastar filmdi erekshe túsiredi. Olar kinosyz ómir súre almaidy. Kózqarastary da basqa. Maǵan teatr da, kino da jaqyn. Kino – ǵajaiyp álem. Qazir bilimdi, talantty jastarymyzdyń film túsirýine múmkindik mol. Osy kinofestival rejisserlar men ártister úshin úlken tájiribe bolatynyna senemin,- deidi «Qurmet», «Parasat» ordenderiniń iegeri Merýert Qarataiqyzy.
– Birinshiden, mundai festivalder kóbine Almaty, Nur-Sultan siiaqty megopolisterde ǵana uiymdastyrylyp keledi. Al shaǵyn qalalarda ótpeidi. Máselen, Kann kinofestivalin uiymdastyrý arqyly Frantsiianyń osy qalasy dúniejúzine tanymal boldy. Halqy ne bary 74 myń adam. Iaǵni, turǵyndary bizdiń Oraldan 5 esege az. Kann osy bir ǵana festival arqyly irgesindegi Nitstsa, Monte-Karlo qalalarynyń da týristik-ekonomikalyq áleýetiniń damýyna serpin berdi. Bizdiń maqsat Oralda týrizmdi damytýǵa úles qosý. Árine, birden bola qoimas. Desek te, Oral – óte ádemi qala. Kino túsirýshiler úshin kamera nysanyna alatyn obektiler jeterlik. Osy oraida HIH, HH ǵasyrdan saqtalǵan arhitektýralyq eskertkishterdi tanystyrsaq deimiz. Budan bólek, Oraldan ekskliýzivti ónerimen tanylǵan daryndar men talanttar az emes. Osy festival endi kino salasyndaǵy jańa tolqynnyń shyǵýyna sep bolady degen senim bar, – deidi festival direktory Alpamys Sharimov.
