Isatai-Mahambettiń eńseli eskertkishi ornatylmaq. Bul týraly qala ákimi Murat Muqaev ziialy qaýym ókilderimen kezdesýde málim etti, dep habarlaidy QazAqparat tilshisi.
Onyń aitýynsha, óńir basshysy Altai Kólginovtiń qoldaýymen qarjy máselesi tolyqtai sheshildi.
«Eskertkishti qai jerde ornatý máselesi buǵan deiin de talqylanyp, túrli pikirler aityldy. Barlyǵy 11 oryn qaraldy. Áitse de, eskertkish aýqymdy, biiktigi shamamen bes qabatty úimen deńgeiles bolǵandyqtan, kópshiligi sáikes kelmedi. Mundai monýmentaldy eskertkishterdi shahardyń kireberisine ornatý kóp qalanyń tájiribesinde bar. Mysaly, Bashqurtstan astanasy Ýfadaǵy ózen jaǵasynda turǵan Salaýat Iýlaev, Almaty oblysyndaǵy Naýryzbai batyr, Ulan-Batyrdan bir saǵattyq joldaǵy ústirtte ornalasqan Shyńǵys han eskertkishterin aitýǵa bolady. Osy tájiribeni eskere otyryp, Isatai-Mahambet eskertkishin qala men Zachagan kenti aralyǵyndaǵy Shaǵan ózeninen ótetin kópirdiń aldyna ornatý kózdelip otyr. Bul oryn tar bolmaidy. Óitkeni, 2019 jyly qalanyń bas josparyna tolyqtyrý engizip, eskertkish ornatylatyn orynnyń eki jaǵyndaǵy ózen jaiylmalaryn biiktetip, saiabaq jasaý kózdelgen. Jaiaý kópir, avtoturaqtar salý da oilastyrylady.
Ekinshiden, osy jermen ótetin Chagano-Naberejnaia kóshesin Isatai-Mahambet dep ataý jóninde usynys bar. Bolashaqta bul uzyn kósheni dańǵylǵa ainaldyrýǵa bolady. Segiz birdei baǵytta avtobýs qatynaityn Zachagan arqyly Atyraý, Saratov oblystaryna jáne Batys Qazaqstannyń ońtústik aýdandaryna jol shyǵady. Zachagan kenti men jańadan boi kóterip jatqan «Aqjaiyq» shaǵynaýdanynda aldaǵy ýaqytta 150 myńǵa jýyq halyq turatyn bolady. Mine, qalaǵa keletin qonaqtar ǵana emes, turǵyndar da kún saiyn Isatai-Mahambet eskertkishine kóz salyp kete alady», - dedi Murat Rahmetuly.
Jiynda qalalyq ardagerler keńesiniń tóraǵasy Kenjebai Nyǵmet, «Qazaqstan» ulttyq arnasy BQO filialynyń direktory Aslanbek Ǵubashev, aqyn-jazýshylar Baýyrjan Ǵubaidýllin, Munaidar Balmolda, teatr qyzmetkeri Nurlan Sádir, qurylysshy Baqytjan Nurbaev jáne basqalar shahar basshysynyń sózin qoldap, óz usynys-pikirlerin bildirdi.
Atalǵan orynnan M.Ótemisov atyndaǵy Batys Qazaqstan memlekettik ýniversiteti qashyq emes. Sondyqtan ýniversitet ataýyn da Isatai-Mahambet dep ózgertse, artyqtyq etpeidi. Eskertkish aldyndaǵy alańqaidy 150 adam syiatyndai etip keńeitip, patriottyq baǵytta sharalar ótkizetin orynǵa ainaldyrýǵa bolady. Osy aralyqqa tiip turǵan Han toǵaiyn jańǵyrtý sharalary qolǵa alynsa degen usynys ta aityldy.
«Munyń bári jumys barysynda eskeriledi. Eskertkish jobasy QR Mádeniet jáne sport ministrligi tarapynan qoldaý tapty. Endigi másele isti sátimen bitirýde», - dep qorytty M.Muqaev.
