Foto: Polisia.kz
Oralda sintetikalyq esirtki zatyn satý úshin jasyryn oryndardy uiymdastyrýmen ainalysqan 16 jastaǵy oqýshy ustaldy, – dep habarlaidy Polisia.kz.
"Keshendi jospar aiasynda esirtki qylmysyna qarsy kúres jáne quqyq buzýshylyqtyń aldyn alý boiynsha jumystar kúsheitildi. 1 maýsym men 31 qazan aralyǵynda respýblika aýmaǵynda esirtki daqyldaryn ósiretin jerlerdi jáne olarmen ainalysatyn tulǵalardy anyqtaýǵa baǵyttalǵan “Qarasora – 2023” jedel-profilaktikalyq is-sharasy ótip jatyr. Jedel-profilaktikalyq is-sharany ótkizý barysynda politsiia departamentiniń qyzmetkerlerimen 94 esirtki qylmysyna qatysty quqyq buzýshylyq, onyń ishinde 44 qylmys jáne 55 qylmystyq áreket anyqtaldy" - delingen habarlamada.
IIM baspasóz qyzmeti málimetinshe, “Qarasora – 2023” jedel-profilaktikalyq is-sharasyn júrgizý barysynda BQO PD esirtki qylmysyna qarsy is-qimyl basqarmasynyń jáne Oral qalalyq PB qyzmetkerleri jasyryn oryndardy uiymdastyrýmen ainalysqan qala mektepteriniń birinde oqityn 11 synyp oqýshysyn, iaǵni 16 jastaǵy bozbalany qolǵa túsirgen. Ol qylmys ústinde ustalǵan. Jeke tintý kezinde ishinde erekshe iisi bar untaq zat salynǵan jasyl tústi izolentamen oralǵan 2 qaptama tabylyp, tárkilengen.
"Azamattyń telefonyn tekserý kezinde jasyrý oryndarynyń koordinattary anyqtaldy, onyń kómegimen ishinde arnaiy iisi bar untaq salynǵan jasyl tústi izolentamen oralǵan 23 qaptama tárkilendi.
Saraptama boiynsha, tárkilengen zattyń salmaǵy 20,18 gramm bolatyn sintetikalyq esirtki ekeni anyqtaldy.
Ustalǵan azamatqa qatysty QR QK-niń 297-baby 3-tarmaǵy 3-bóligi (Esirtki, psihotroptyq zattardy, sol tektesterdi ótkizý maqsatynda zańsyz daiyndaý, qaita óńdeý, iemdený, saqtaý, tasymaldaý, jóneltý ne ótkizý) boiynsha sotqa deiingi tergep-tekserý amaldary bastaldy" - delingen habarlamada.
