Oralda qoǵamdyq kólikter 28 sáýirden bastap qaita júretin boldy, dep habarlaidy "Ult aqparat".
Oral qalasynyń ákimi Abat Shynybekovtiń málim etkenindei, Memleket basshysynyń tapsyrmasyna sáikes óńirlerde de karantindik shekteý sharalaryn jeńildetý jumystary qolǵa alyndy.
Barlyq baǵyttaǵy avtobýstar tańǵy 06.00-den keshki 19.00-ge deiin qatynaidy. Tek qoǵamdyq kólik ieleri men júrgizýshiler sanitarlyq talaptardy qatań saqtaýy tiis.
Ákimniń sózine qaraǵanda, kóktemgi egý maýsymy bastalǵandyqtan, turǵyndar arasynda saiajaiaǵa barý máselesi jii qozǵalyp keledi. Kúni búgin qalada 176 baý-baqsha seriktestigi bolsa, sonyń 150-den astamy jumys isteidi. Saiajailarda 18 myńnan astam adam turaqty turyp jatyr.
Buǵan deiin saiajailarǵa senbi jáne jeksenbi kúnderi ǵana barýǵa ruqsat etilgen bolatyn. Endi 28 sáýirden bastap kestege ózgeris engiziledi. Qalada qozǵalys jiiligin saqtaý úshin memlekettik nómiri taq sanmen bastalatyn avtokólikter sársenbi, juma, jeksenbi, jup sanmen bastalatyn kólikter seisenbi, beisenbi, senbi kúnderi saiajaiǵa baryp, saǵat 09.00-den keshki 19.00-ge deiin bola alady. Olardyń qolynda tiisti qujattary bolýy tiis. Kólikte júrgizýshiden basqa eresek úsh adamnan artyq bolmaýy kerek. Balalar da jol qozǵalysy erejelerine sai otyrýy qajet.
Oǵan qosa jasy 65-ten asqan azamattarǵa saiajaiǵa barýǵa ruqsat etiledi. Áitse de saiajailarda bógde adamdardyń qatysýymen kópshilik sharalardy uiymdastyrýǵa, jer qopsytýdy qospaǵanda, jaldamaly jumysshylardy tartýǵa tyiym salynady.
Qala basshysynyń aitýynsha, oblystaǵy iri óndiris oryndary men zaýyttar, memlekettik baǵdarlamalar boiynsha tapsyrysqa sáikes jumys jasaityn kásiporyndar barlyq sanitarlyq talaptardy saqtai otyryp, jumystaryn jalǵastyrady.
Sondai-aq 28 sáýirden bastap avtokólikke qyzmet kórsetetin, janar-jaǵar mai quiý stansalary, qosalqy bólshek satatyn, himiialyq tazalaý, uiymdastyrý tehnikasyn jóndeý oryndary ashylady. Basqa kásiporyndar da kezeń-kezeńmen qyzmetine kirisetin bolady.
«Qalada turǵyndarǵa úilerinen alystamai, serýendeýine bolady. Bul rette jeke qorǵanys quraldaryn umytpai, qujattaryn ózderimen birge alyp júrý kerek. Úsh adamnan artyq jinalýǵa bolmaidy. Balalar eresektermen birge bolýy qajet. Serýendegen kezde 2 metr qashyqtyqty saqtaý kerek», dedi Abat Shynybekov.
