BQO qylmystyq ister jónindegi mamandandyrylǵan aýdanaralyq sotynyń úkimimen burynǵy kelinin óltirgen Asylbek Omarov aiypty dep tanyldy, dep habarlaidy "Ult aqparat".
Sýdia Baqyt Ermahanovtyń málim etkenindei, A.Omarov QR QK 99-baby 1-bóligine sáikes 11 jylǵa bas bostandyǵynan aiyrý jazasyn qaýipsizdigi joǵary qylmystyq-atqarý júiesi mekemesinde óteýge sottaldy.
Sonymen qatar, sottalýshy qaza tapqan Aqerke Qozykeshevanyń otbasyna moraldyq ótemaqy retinde 5 mln teńge jáne materialdyq shyǵyn esebinde 1,4 mln teńge tóleýi tiis.
Sot sondai-aq BQO ishki ister departamenti bastyǵy atyna qyzmetkerleriniń tiisti shara qoldanbaǵany úshin jeke uiǵarym shyǵardy. Óitkeni, Aqerke qaza tabarynan bir kún buryn, 7 sáýir kúni 102 telefonyna habarlasyp, Omarovtyń kek alamyn dep ómirine qaýip tóndirgenin aitqan. Áitse de, budan eshqandai nátije shyqpaǵan.
Sot talqysynda belgili bolǵandai, Semei qalasynda turǵan 28 jasar Aqerke Qozykesheva óziniń ulyn alyp ketý úshin Oralǵa kelgen. 8 sáýir kúni Aqerke burynǵy kúieýi Saiat Qozykeshevpen jáne kishkentai ulymen kezdesý úshin ata-enesiniń úiine kelgen. Ol kezde Aqerkeniń eki jasar uly Oralda, burynǵy kúieýiniń ata-anasynyń qolynda bolǵan.
Úidiń aýlasynda Aqerke men Saiat, qaiyn atasy Asylbektiń arasynda janjal týyndaǵan. Budan keiin Aqerke, onyń burynǵy kúieýi men uly taksige otyryp, jaldamaly páterge ketken. Sottalýshy Asylbek Omarov jolai taksi ustap, uly men burynǵy kelini otyrǵan kóliktiń artynan júrgen. Tiisti jerge kelgennen keiin, Omarov birinshi podezge kirip, uly men burynǵy kelini jaldaǵan páterdi izdei bastaidy. Ol Aqerke men Saiattyń daýsyn estip, 5-qabattaǵy páterdi tabady. Omarov uly men nemeresiniń ketkenin kútip, kelinimen sóilesý úshin páterdiń esigin qaǵady. Basynda Aqerke burynǵy qaiyn atasyn páterge kirgizgisi kelmegen. Sóilesýge niet bildirgen Asylbek Omarov pen kelininiń arasynda daý-damai týyndaǵan. Osy kezde Aqerkeni judyryǵymen betinen uryp jiberedi. Burynǵy kelini qulap qalǵannan keiin Omarov ony uryp, tepkilei bastaǵan. Munan soń janynda jatqan sholaq shalbardyń baýyn alyp, onymen burynǵy kelinin býyndyrǵan. Artynsha asúiden pyshaq alyp, Aqerkeniń keýdesine pyshaq salǵan.
Sot-meditsinalyq saraptama qorytyndysyna sáikes, marqum júrek tusynan suǵylǵan pyshaq jaraqatynan kóz jumǵan.
Eske sala keteiik, budan buryn kelinin óltirdi degen kúdikpen qaiyn atasynyń qamalǵanyn, onyń óz qylmysyn moiyndaǵanyn jazǵan bolatynbyz.
