Oral qalalyq soty jaiaý júrginshilerge arnalǵan jerde eki balanyń anasy Evgeniia Bondarenkony qaǵyp óltirgen 37 jastaǵy biznesmen Aleksandr Karagoishinǵa qatysty sanktsiia shyǵardy. Sýdianyń aitýyna qaraǵanda, "Jienbai" JShS direktory qylmystyq qýdalaýdan qashyp ketýi múmkin, - dep habarlaidy "Ult aqparat" kaz.tengrinews.kz portalyna silteme jasap.
Sottaǵylar Karaigoishin jasady degen qylmystyq árekettiń QR Qylmystyq kodeksiniń 345-babynyń 3-bóligine ("Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy") sáikes keletinin aitady.
Tergeý organdary kásipkerdiń qamaýǵa alynýyn surady. Prokýratýra ókilderi óz kezeginde er adamnyń bostandyqta júrýi tergeýge kedergi keltirip, onyń tergeý men sottan jasyrynýy múmkin ekenin aitty.
Al qaza bolǵan Evgeniia Bondarenkonyń zańdy ókilderi bul ótinishti qoldamaityndaryn málimdedi. Aita keteiik, olarǵa materialdyq jáne moraldyq shyǵyn tolyq kólemde tólengen bolatyn, olardyń endi kásipkerge esh shaǵymy joq.
"Meniń qorǵalýshym óz kinásin tolyqtai moiyndap, qaza tapqan áieldiń týystarynan keshirim suraidy. Onyń turǵylyqty mekenjaiy bar, osyǵan deiin sotty bolmaǵan jáne kishkentai balalary bar. Ony kepilmen bostandyqqa shyǵarýlaryńyzdy suraimyn", - dedi advokat.
Biraq sýdia prokýratýranyń ótinishin qanaǵattandyryp, Aleksandr Karagoishindy eki aiǵa qamaýǵa alý týraly sanktsiia shyǵardy.
Eske sala keteiik, 11 qarashada keshki ýaqytta Aleksandr Karagoishin Toyota Land Cruiser kóligimen 31 jastaǵy Evgeniia Bondarenkony qaǵyp óltirgen bolatyn. Áiel sol sátte qyzyna dári alýǵa dárihanaǵa bara jatqan. Onyń artynda eki qyzy qaldy.
