Foto: instagram.com/tdk42tv
Oralda áskerge shaqyrylǵan jigit áskeri komissariattan qashpaq bolyp, úshinshi qabattan qulap ketti, - dep habarlaidy Ult.kz "Moi gorod" basylymyna silteme jasap.
Oqiǵa 1 jeltoqsanǵa qaraǵan túni boldy. Jigitti eki dosymen birge áskeri komissariatqa jetkizgen. Onyń týystarynyń aitýynsha, shaqyrylýshy buryn áskeri qyzmetke shaqyrtý almaǵan jáne psihologiialyq turǵyda áskerge daiyn bolmaǵan.
"Olardy úshinshi qabattaǵy jatyn bólmege ornalastyrǵan. Sol jerde basqa bir jigit olardy qashýǵa úgittegen. Ol ózin bai adamnyń balasymyn, aiyppuldy tólep beremin dep aldaǵan eken, biraq shyn máninde daiashy bolyp shyqty. Túnde sol jigit tósek japqyshtardy bailap, tómen tústi. Onyń artynan bizdiń ulymyzdyń dostary da tústi. Keiin ulymyz da qashýǵa tyrysty, biraq japqyshtar úzilip ketip, ol jerge qulap tústi", - deidi jigittiń aǵasy.
Jigit aýyr jaraqattar alǵan: omyrtqasy synǵan jáne denesi sal bolyp qalý qaýpi bar. Oǵan operatsiia jasatýǵa týra keledi. Jábirlenýshiniń týystary áskeri komissariat qyzmetkerlerin óz mindetterine salǵyrt qarady dep aiyptap otyr.
Batys Qazaqstan oblysynyń qorǵanys isteri jónindegi departamenti jigittiń buǵan deiin 1414 bailanys nómiri arqyly shaqyrtý alǵanyn málimdedi.
"Ol 2023 jyly oqýyn bitirgen. "Áskeri qyzmet týraly" zań boiynsha onyń áskeri qyzmetten bosatý nemese keiinge qaldyrý sebebi bolmaǵan. Shaqyrtý qaǵazyn almaǵan jaǵdaida, ony jetkizý jergilikti ishki ister organdaryna júkteledi. 30 qarashada keshki saǵat 17:00 shamasynda politsiia qyzmetkerleri ony oblystyq jiyn pýnktine jetkizgen. Shaqyrylýshylarǵa eshqandai moraldyq nemese psihologiialyq qysym kórsetilgen joq. Jataq bólmesinde olar tósek japqyshtardy bailap, úshinshi qabattan túsýge áreket jasaǵan. Bir jigit qulap, aýyr jaraqat alǵan. Qazir onyń jaǵdaiyn meditsinalyq qyzmet basshylary baqylap otyr", - dedi departament ókilderi.
Jábirlenýshige QR QK 387-baby "Áskeri qyzmetten jaltarý" boiynsha qylmystyq is qozǵaý týraly ótinish jiberilgen. Oǵan 3 myń AEK kóleminde aiyppul nemese 2 jylǵa deiin bas bostandyǵynan aiyrý jazasy taǵaiyndalýy múmkin.
Kezekshilikti atqarǵan qyzmetkerdiń is-áreketine qatysty ishki tekseris júrip jatyr. Onyń kinásiniń deńgeii anyqtalatyn bolady.
