Oral qalalyq soty 21 jastaǵy Anastasiia Chernaianyń ólimine qatysty is boiynsha úkim shyǵardy, - dep habarlaidy Tengrinews.kz tilshisi.
28 jastaǵy Temirlan Amanǵaliev densaýlyqqa aýyr ziian keltirgeni úshin kináli dep tanylyp, bas bostandyǵynan aiyryldy.
Bul protsess úlken rezonans týdyrdy. Er adam qyzdy óltirip qana qoimai, aiǵaqtardan qutylmaq bolǵan. Ol Anastasiia Chernaianyń denesin ormanǵa aparyp, benzin shashyp, órtep jibergen. Ony jergilikti shopan taýyp alǵan. Prokýror sottan Qazaqstan Respýblikasy Qylmystyq kodeksiniń 106-baby boiynsha sottalýshyny 8 jylǵa bas bostandyǵynan aiyrýdy surady.
"Amanǵalievke janjal shyǵarmaýyna bolar edi. Biraq ol óziniń kúsh-qýatynyń basymdylyǵyn paidalanyp, oǵan aýyr dene jaraqatyn saldy, nátijesi ólimge ákep soqty. Onyń kinási tolyǵymen dáleldendi", - dedi memlekettik aiyptaýshy Anastasiia Semilidi.
Sot Temirlan Amanǵalievti 8 jylǵa bas bostandyǵynan aiyryp, jazasyn ortasha qaýipsizdiktegi túzeý mekemesinde óteý týraly úkim shyǵardy. Sondai-aq, ol marqumnyń anasyna 159 000 teńge materialdyq jáne alty million teńge moraldyq shyǵyndy óteýi tiis.
"Biz jazany qatańdatý kerek dep sanaimyz. Ol eki jasar qyzdy anasynan aiyrdy. Anastasiia meiirimdi jáne janashyr adam edi", - dedi Svetlana Lobanova.
Eske salaiyq, 15 qyrkúiekte Vetelki aýyly mańyndaǵy ormanda jas qyzdyń órtengen denesi tabylǵan bolatyn. Bul joǵalǵan Anastasiia Chernaia ekeni anyqtaldy. Ólimniń sebebi - bas-mi jaraqaty. Sottalýshy Temirlan Amanǵaliev qyzdy óltirgisi kelmegenin aityp, kinásin moiyndady.
