Oral qalasyndaǵy «Aqjaiyq» shaǵynaýdanynda aldaǵy jyly turǵyn úi salý jumystary bastalady, dep habarlaidy "Ult aqparat".
Oblys ákimi Ǵali Esqalievtiń Ortalyq kommýnikatsiialar qyzmeti alańynda ótken brifingide málim etkenindei, bul iri joba óńirdiń qurylys salasynyń damýyna tyń serpilis bereri sózsiz.
Qazirgi tańda injenerlik jeliler ótkizilip, turǵyn úiler salýǵa alǵashqy investorlar da anyqtaldy.
Prezidentimiz «Azamattardyń áleýmettik ál-aýqaty eń aldymen turǵyn úi máselesimen tyǵyz bailanysty» dep atap kórsetken bolatyn.
Osy jyly «Nurly jer» memlekettik baǵdarlamasy sheńberinde 17 kóppáterli turǵyn úige (2503 páter) jáne aýyldyq jerdegi 139 turǵyn úi (474 páter) qurylysyna 21,1 mlrd. teńge qarajat bólindi.
Ákimniń sózine qaraǵanda, jyl aiaǵyna deiin kezekte turǵandar men «Turǵyn úi qurylys jinaq bankiniń» salymshylaryna biýdjet qarajaty esebinen 1083 páter berý josparlanýda. Bul ótken jylmen salystyrǵanda, 1,8 esege kóp.
Oral qalasynda turǵyn úi salýǵa jer kezeginde turǵan azamattarǵa sońǵy ret jer telimi 2011 jyly ǵana berilgen.
Bul rette óńirde tiisti kommýnikatsiialarmen qamtamasyz etilgen áleýmettik jeke úiler salý úshin Oral qalasy men aýdandarda jer telimderin usyný baǵytynda jumystar atqarylýda. Mysalǵa, Oral qalasynyń Krýgloozernyi kentinde 1 141 ýchaskege arnalǵan egjei-tegjeili josparlaý jospary aiaqtala keldi. Aldaǵy jyly injenerlik-kommýnikatsiialyq jeliler ótkizilgen soń, kezekte turǵan azamattarǵa jer telimderi berile bastaidy.
«Sondai-aq Terekti aýdanyna qarasty Fedorov aýylynda 528 jer telimi jáne Qaratóbe aýdanynda 144 jer telimi daiyndaldy. Bul jumystar aýyldaǵy aǵaiyndardyń turǵyn úi máselesin sheshýge jáne aýyl azamattarynyń oblys ortalyǵyna migratsiiasyn azaitýǵa sep bolady», dedi Ǵ.Esqaliev.
