Batys Qazaqstan oblysynyń Qylmystyq ister jónindegi mamandandyrylǵan aýdanaralyq sotynda D.Meńdiǵalievke qatysty úkim shyqty, dep habarlaidy "Ult aqprat".
Atalǵan sottan túsken málimetke qaraǵanda, is beinebailanys júiesi jáne TrueConf baǵdarlamasy arqyly qaraldy.
Buryn sottalmaǵan D.Meńdiǵaliev QR QK 99-baby 1-bóligine (adam óltirý) sáikes aiypty dep tanylyp, 10 jylǵa bas bostandyǵynan aiyrý jazasyn qaýipsizdigi barynsha joǵary qylmystyq-atqarý júiesi mekemesinde óteýge sottaldy.
Sot tergeýinde D.Meńdiǵaliev aiybyn moiyndap, shyn ókinetinin bildirdi jáne onyń kinási tolyq dáleldendi.
Sot talqysynda anyqtalǵanyndai, D.Meńdiǵaliev biyl 10 aqpanda keshke jezdesimen birge ákesi turatyn páterge kelip, úsheýi araq ishken. Bir shólmek túgesilgennen keiin jezdesi úiine ketip, ákeli-balaly ekeýi araq ishýin jalǵastyrǵan.
Saǵat 21.30 shamasynda masaiý saldarynan ekeýiniń arasynda kelispeýshilik týyndap, ákesi «Óltir meni» dep, eki pyshaqty balasyna qarai laqtyryp jibergen. Uly ákesine «Men seni óltirip, sottalǵym kelmeidi» dep jaýap bergen. Biraq ákesi qolyna qalam alyp, bloknotqa «Bárine ózim kinálimin, bala kiná...» degen sózderdi jaza bastaǵanda, uly M.Meńdiǵalievtiń keýdesine úsh ret pyshaq salǵan. Er adam sol jerde kóz jumǵan.
Sot úkimi kúshine engen joq.
