Búgin Oral qalasyndaǵy Shaǵan ózeninde «Abai» manevrlik turaqtaý pýnkti sýǵa túsirildi, dep habarlaidy "Ult aqparat".
Saltanatty rásimge qatysqan oblys ákimi Ǵali Esqaliev osy erekshe kemeni bir jylda qurastyryp shyǵarǵan «Oral «Zenit» zaýyty» AQ ujymynyń eńbegin atap ótti.
«Elimizdiń qorǵanys qabiletin nyǵaitý baǵytynda sý yǵystyrylymy 500 tonnadan asatyn manevrlik turaqtaý pýnktiniń mańyzy zor. Bul Kaspii teńizinde kemeler men katerlerdiń qyzmetin tiimdi uiymdastyrýǵa múmkindik beredi. Sol sebepti zaýyt ujymyna, osy kásiporyndy otyz jyldan astam ýaqyt boiy basqaryp kele jatqan Viacheslav Valievke alǵysymdy bildiremin. Qazirgi tańda zaýytta 900-dei jumysshy bolsa, sonyń 150-deii – jas mamandar. Ótken ǵasyrdyń sekseninshi jyldary munda tórt myńdai adamnyń eńbek etkeni belgili. Aldaǵy ýaqytta jumysshy-qyzmetkerlerdiń qatary tolyǵa túsedi dep senemiz. Biyl Úkimet tarapynan jasalǵan qoldaýdyń nátijesinde tek «Zenit» zaýyty ǵana emes, sondai-aq «Batys Qazaqstan mashina jasaý kompaniiasy» AQ, «Gidropribor» ǴZI» AQ memlekettik qorǵanystyq tapsyrystar aldy. Bul – úlken kómek», dedi óńir basshysy.
QR UQK Shekara qyzmeti direktorynyń birinshi orynbasary Aidar Aimýrzinniń aitýynsha, budan buryn zaýyt shyǵarǵan 30 kater, kemeler Kaspii teńizinde óz qyzmetterin múltiksiz atqaryp keledi. Biyldyń ózinde tórt aidyń ishinde solardyń qatysymen 41 kemedegi zańbuzýshylyq anyqtaldy. Tabiǵatqa 1 mlrd astam teńgeniń zalalyn keltirýdiń joly kesildi. Eger buryn kemeler senimdiligimen, jyldamdyǵymen erekshelense, endi olar arnaiy turaqqa qol jetkizdi. Kóp uzamai Kórik eldi mekeninde oryn tebetin manevrlik turaqtaý pýnkti kemelerdi janar-jaǵar maimen, azyq-túlikpen qamtamasyz etedi. Sondai-aq júze alatyn pýnkt zákirmen teńizge de ornalasa alady.
«Bul turaqtaý pýnktine Abaidyń 175 jyldyǵyna orai uly aqynnyń esimin berý uiǵaryldy», dedi A.Aimýrzin.
«Zenit» zaýytynyń direktory Viacheslav Valiev kásiporynda sondai-aq «Qaisar» jáne «Aibar» dep atalatyn katerlerdiń qurastyrylyp jatqanyn da jetkizdi.
Eske sala keteiik, budan buryn «Zenit» zaýytynyń birinshi dárejeli Otan soǵysy ordenimen marapattalǵan Qazaqstandaǵy jalǵyz kásiporyn ekendigin jazǵan bolatynbyz.
