بٷگٸن ورال قالاسىنداعى شاعان ٶزەنٸندە «اباي» مانەۆرلٸك تۇراقتاۋ پۋنكتٸ سۋعا تٷسٸرٸلدٸ, دەپ حابارلايدى "ۇلت اقپارات".
سالتاناتتى رەسٸمگە قاتىسقان وبلىس ەكٸمٸ عالي ەسقاليەۆ وسى ەرەكشە كەمەنٸ بٸر جىلدا قۇراستىرىپ شىعارعان «ورال «زەنيت» زاۋىتى» اق ۇجىمىنىڭ ەڭبەگٸن اتاپ ٶتتٸ.
«ەلٸمٸزدٸڭ قورعانىس قابٸلەتٸن نىعايتۋ باعىتىندا سۋ ىعىستىرىلىمى 500 توننادان اساتىن مانەۆرلٸك تۇراقتاۋ پۋنكتٸنٸڭ ماڭىزى زور. بۇل كاسپيي تەڭٸزٸندە كەمەلەر مەن كاتەرلەردٸڭ قىزمەتٸن تيٸمدٸ ۇيىمداستىرۋعا مٷمكٸندٸك بەرەدٸ. سول سەبەپتٸ زاۋىت ۇجىمىنا, وسى كەسٸپورىندى وتىز جىلدان استام ۋاقىت بويى باسقارىپ كەلە جاتقان ۆياچەسلاۆ ۆاليەۆكە العىسىمدى بٸلدٸرەمٸن. قازٸرگٸ تاڭدا زاۋىتتا 900-دەي جۇمىسشى بولسا, سونىڭ 150-دەيٸ – جاس ماماندار. ٶتكەن عاسىردىڭ سەكسەنٸنشٸ جىلدارى مۇندا تٶرت مىڭداي ادامنىڭ ەڭبەك ەتكەنٸ بەلگٸلٸ. الداعى ۋاقىتتا جۇمىسشى-قىزمەتكەرلەردٸڭ قاتارى تولىعا تٷسەدٸ دەپ سەنەمٸز. بيىل ٷكٸمەت تاراپىنان جاسالعان قولداۋدىڭ نەتيجەسٸندە تەك «زەنيت» زاۋىتى عانا ەمەس, سونداي-اق «باتىس قازاقستان ماشينا جاساۋ كومپانيياسى» اق, «گيدروپريبور» عزي» اق مەملەكەتتٸك قورعانىستىق تاپسىرىستار الدى. بۇل – ٷلكەن كٶمەك», دەدٸ ٶڭٸر باسشىسى.
قر ۇقك شەكارا قىزمەتٸ ديرەكتورىنىڭ بٸرٸنشٸ ورىنباسارى ايدار ايمۋرزيننٸڭ ايتۋىنشا, بۇدان بۇرىن زاۋىت شىعارعان 30 كاتەر, كەمەلەر كاسپيي تەڭٸزٸندە ٶز قىزمەتتەرٸن مٷلتٸكسٸز اتقارىپ كەلەدٸ. بيىلدىڭ ٶزٸندە تٶرت ايدىڭ ٸشٸندە سولاردىڭ قاتىسىمەن 41 كەمەدەگٸ زاڭبۇزۋشىلىق انىقتالدى. تابيعاتقا 1 ملرد استام تەڭگەنٸڭ زالالىن كەلتٸرۋدٸڭ جولى كەسٸلدٸ. ەگەر بۇرىن كەمەلەر سەنٸمدٸلٸگٸمەن, جىلدامدىعىمەن ەرەكشەلەنسە, ەندٸ ولار ارنايى تۇراققا قول جەتكٸزدٸ. كٶپ ۇزاماي كٶرٸك ەلدٸ مەكەنٸندە ورىن تەبەتٸن مانەۆرلٸك تۇراقتاۋ پۋنكتٸ كەمەلەردٸ جانار-جاعار مايمەن, ازىق-تٷلٸكپەن قامتاماسىز ەتەدٸ. سونداي-اق جٷزە الاتىن پۋنكت زەكٸرمەن تەڭٸزگە دە ورنالاسا الادى.
«بۇل تۇراقتاۋ پۋنكتٸنە ابايدىڭ 175 جىلدىعىنا وراي ۇلى اقىننىڭ ەسٸمٸن بەرۋ ۇيعارىلدى», دەدٸ ا.ايمۋرزين.
«زەنيت» زاۋىتىنىڭ ديرەكتورى ۆياچەسلاۆ ۆاليەۆ كەسٸپورىندا سونداي-اق «قايسار» جەنە «ايبار» دەپ اتالاتىن كاتەرلەردٸڭ قۇراستىرىلىپ جاتقانىن دا جەتكٸزدٸ.
ەسكە سالا كەتەيٸك, بۇدان بۇرىن «زەنيت» زاۋىتىنىڭ بٸرٸنشٸ دەرەجەلٸ وتان سوعىسى وردەنٸمەن ماراپاتتالعان قازاقستانداعى جالعىز كەسٸپورىن ەكەندٸگٸن جازعان بولاتىنبىز.
