Oralda on jasar balany kóligimen qaǵyp óltirgen qyzǵa úkim shyqty, dep habarlaidy "Ult aqparat".
Oral qalalyq sotynyń úkimimen 22 jastaǵy qyz QR QK 345-baby 3-bóligine sáikes aiypty dep tanylyp, 1 jyl bas bostandyǵynan aiyrý jazasyn qaýipsizdigi barynsha tómen qylmystyq-atqarý júiesi mekemesinde óteý belgilendi.
Ol sondai-aq 5 jyl merzimge kólik quralyn basqarý quqyǵynan aiyrylyp, kúzetpen ustaý túrindegi bultartpaý sharasy ózgerissiz qaldyryldy.
Sot talqysynda anyqtalǵandai, sottalýshy 17 qarasha kúni saǵat 09.11 shamasynda «Hyundai Tucson» avtokóligimen Máskeý kóshesimen kele jatyp, oqýshylar saraiy tusynda rettelmeitin jaiaý júrginshiler ótkelinen ótip bara jatqan 10 jasar balany qaǵyp ketken.
Bala qalalyq kópbeiindi aýrýhanasyna jetkizilgenimen, esin jiia almastan, saǵat 10.05-te kóz jumdy.
Basty sot talqysynda sottalýshy ózine taǵylǵan aiypty tolyq moiyndap, jeńil jaza taǵaiyndaýdy surady.
Jábirlenýshi ókili de qazirgi tańda sottalýshyǵa qoiar talaby joqtyǵyn jetkizip, jeńil jaza taǵaiyndaýdy ótingen.
Sot úkim shyǵarǵan kezde sottalýshynyń jeke basy men jastyǵyn jáne qyz bala ekenin, buryn sotty bolmaǵanyn, istiń mán-jaiyn, jaýaptylyǵy men jazasyn jeńildetetin mán-jailaryn, jábirlenýshi ókiliniń sottalýshyǵa qatysty jaza taǵaiyndaý jónindegi pikirin eskerdi.
BQO sotynyń baspasóz qyzmeti málim etkendei, úkim zańdy kúshine engen joq.
