Oralda tórtinshi jyl qatarynan tergeý izoliatorynyń qurylysy toqtap tur. Ótken jyly nysandy meditsinalyq mekemege beredi degen jospar kópshilikke málim boldy. Biraq ázirge nysannyń taǵdyryna qatysty túpkilikti sheshim qabyldanǵan joq, - dep habarlaidy Tengrinews.kz tilshisi.
Qylmystyq atqarý júiesi departamenti nysannyń qurylysy 2013 jyly bastalǵanyn atap ótti. Tutqyndar Oral qalasynyń dál ortasynda ornalasqan ýaqytsha ustaý izoliatorynan jańa tergeý izoliatoryna aýystyrylýy kerek edi.
"Qazirgi tergeý izoliatory apatty jaǵdaida tur. Ǵimarat 19 ǵasyrda Ekaterina II jarlyǵymen salynǵan. Tergeý izoliatoryn salý kezinde qurylys normalaryn buzý deregi anyqtaldy. Nysannyń 70 paiyz jumysy aiaqtaldy. Qazirgi ýaqytta ǵimarat Batys Qazaqstan oblysy ákimdiginiń qaramaǵyna berildi, 2018 jyldan beri qurylys jumystary toqtap tur", - dedi IID basshysynyń orynbasary Asqar Tilegenov.
BQO ákimdigi qurylysy aiaqtalmaǵan nysan qurylys basqarmasyna qaraitynyn naqtylady.
"Salynyp bitpegen tergeý izoliatorynyń ǵimaratyn áleýmettik nysanǵa berýdi josparlap otyrmyz. Onyń maqsaty investorlarmen kelissózderge bailanysty bolady", - dedi BQO ákiminiń baspasóz hatshysy Nurhat Janboz.
Ótken jyly oblys ákimdiginde ótken otyrysta nysandy meditsinalyq mekemege berýge bolady dep málimdegen. Biraq qazir mundai nusqalar qarastyrylmaidy.
"Bul jerden kardiologiialyq ortalyq nemese aýrýhana ashylady degen jospar bolǵan. Biraq qazirgi ýaqytta bul másele kún tártibinen alynyp tastaldy", - dedi BQO densaýlyq saqtaý basqarmasy basshysynyń orynbasary Ashat Balyqov.
Jobanyń jalpy somasy 10 milliard teńge. Bul qarajattyń basym bóligi igerilgeni atap ótildi.
