Memleket basshysy Qasym-Jomart Toqaevtyń tapsyrmasymen QR Ekologiia, geologiia jáne tabiǵi resýrstar ministri Maǵzum Myrzaǵaliev Batys Qazaqstan oblysyna jumys saparymen bardy, dep habarlaidy "Ult aqparat".
Sapar aiasynda ministr ǵalymdarmen, ekologtarmen birge jergilikti turǵyndar kótergen kiik sanynyń kóbeiýine bailanysty jaiylymdyq jerlerdiń tarylýyna qatysty máseleni sheshý joldaryn talqylady.
«Sizderge Prezident tapsyrmasymen ǵalymdarmen birge arnaiy kelip otyrmyn. Eki jaqqa da tiimdi sheshimder qabyldaý úshin Ekologiia, Aýyl sharýashylyǵy, Bilim jáne ǵylym ministrlikteri jáne halyqaralyq uiymdar, institýttar quramyna kiretin jumys tobyn quryp otyrmyz. Qysqa merzimde zertteýlerdi bitirýge tyrysamyz», - dedi ministr.
Maǵzum Myrzaǵaliev máseleniń sheshiminiń úsh jolyn atady.
«Birinshisi - jalpy aýdany 343040,1 gektar «Bókeiorda» memlekettik tabiǵi rezervatyn, sondai-aq jalpy aýdany 314505,1 gektar Ashyózek memlekettik tabiǵi qaýmalyn qurý. Bul boiynsha barlyq negizdemeler daiyn. Rezervat qurý arqyly jańa jumys oryndary da ashylady. Ekinshisi - osy rezervatta geologtardyń aralasýymen sý kózderin anyqtap, kiikterge jasandy sýat daiyndaý. Ol tek kiikke ǵana emes, halyqqa da paidaly. Úshinshiden kiikterdiń Oral popýliatsiiasynyń bir bóligin Jaiyqtyń oń jaǵalaýyna ótkizý máselesin qarastyramyz», - dedi ministr.
Batys Qazaqstan oblysynyń ákimi Ǵali Esqaliev qurylǵan jumys tobyna jergilikti sharýa qojalyqtary ókilderi de kiretinin, barlyq zertteýler, sharalar ashyq júretinin jetkizdi.
QR BǴM Zoologiia institýtynyń teriologiia zerthanasynyń meńgerýshisi Aleksei Grachev qazir kiik sanyn retteý máselesin múldem qozǵaýǵa bolmaityndyǵyn aitady.
«Qandai da bir sheshim qabyldamas buryn, máseleni egjei-tegjeili zerdeleý qajet. Memleket óz ýaqytynda kiikterdiń sanyn qalpyna keltirý úshin úlken resýrstar jumsady. Qazir ol tek qalpyna keltirý satysynda, iaǵni ol áli de maksimýmǵa jetken joq. Sol sebepti ázirge olardy atýǵa ruqsat berip, sanyn azaitý týraly sóz qozǵaýǵa erte», - dedi ǵalym.
Aita keteiik, Batys Qazaqstan oblysy – elimizdegi kiikter eń kóp shoǵyrlanǵan óńir. 2019 jylǵy sanaq boiynsha BQO aýmaǵynda 217 myń bas kiik bolǵan. 2020 jyly koronavirýs pandemiiasyna bailanysty sanaq júrgen joq. 2023 jylǵa deiin kiikterdi ǵylymi qoldanystan basqa maqsatta qoldanýǵa zańmen tyiym salynǵan.
