Oral áýejaiy ǵimaratynyń qurylysy jarty jylǵa sozylýy múmkin, dep habarlaidy "Ult aqparat".
«Oral» ÁKK» UK» AQ basqarma tóraǵasy Diias Jánibekovtiń aitýynsha, biyl shildede bastalǵan ǵimaratty qaita salý jumysyn aldaǵy jyldyń kúzinde aiaqtaý kózdelgen bolatyn.
Alaida buzý jumystary kezinde ǵimarattyń irgetasy qatty otyryp ketkeni anyqtaldy.
«Osyǵan bailanysty jobany qaita naqtylaý qajettigi týyndady. Qazir osy jumystar júrgizilýde. Sol sebepti qurylys merzimi alty aiǵa uzaryp, shamamen 2021 jyldyń kóktemine deiin sozylýy múmkin», dedi D.Jánibekov.
Salynǵanyna qyryq jyl bolǵan atalmysh ǵimarat sodan beri jóndeý kórmegen bolatyn. Ony qaita jańǵyrtý quny 3,2 mlrd teńgege baǵalanǵan edi. Ǵimarat iske qosylǵan kezde aýmaǵy anaǵurlym keńeiedi.
«Oral» halyqaralyq áýejaiy» JShS bas direktory Hairetdin Rasqalievtiń sózine qaraǵanda, qazirgi kezde jolaýshylar ótip jatqan ǵimarat óte tar bolǵandyqtan áýe reisteri soǵan sáikestendirildi. Iaǵni keptelis bolmas úshin reister arasy keminde eki saǵatqa uzartyldy.
