Aqtaýdaǵy Nazarbaev Ziiatkerlik mektebiniń qyzmetkeri mas kúide jumysqa keldi degen video áleýmettik jelide tarady. Jazbaǵa qatysty oqý ornynda ishki tekseris bastaldy, dep habarlaidy ult.kz.
Lada.kz saitynyń jazýynsha, videoda oqýshylar er adamnan mektepke ne sebepti mas kúide kelgenin suraidy. Qyzmetker «solai bolyp qaldy» dep jaýap berip, ishimdik ishkenin joqqa shyǵarmaidy ári keshirim suraidy.
Jazba avtorlarynyń aitýynsha, bul mundai alǵashqy jaǵdai emes. Oqýshylardyń sózinshe, qyzmetker mektepke ishimdik iship birneshe ret kelgen. Sondai-aq olardyń birinde er adam balalarmen dóreki sóilesip, janjal shyǵarǵany aitylǵan. Alaida bul málimetter ázirge resmi túrde rastalǵan joq.
Aqtaýdaǵy NZM direktory Rinat Jumabaev videoǵa bailanysty mektep ákimshiligi ishki tergeý bastaǵanyn málimdedi.
«Mektepte ishki tergeý júrgizilip jatyr. Baiandalǵan faktiler tekserilýde. Tekseris aiaqtalǵannan keiin, eger qyzmetker tarapynan buzýshylyqtar rastalsa, Eńbek kodeksine sáikes jumystan shyǵarýǵa deiingi sharalar qoldanylady», – dedi direktor.
Jaǵdaidy Mańǵystaý oblysynyń bilim berý júiesi de baqylaýǵa alǵan. Oqý-aǵartý ministrliginiń málimetinshe, áleýmettik jelidegi jariialanymnan keiin bilim berý salasynda sapany qamtamasyz etý jónindegi óńirlik departament mán-jaidy anyqtaý úshin NZM-ge júgingen.
Ministrlik Nazarbaev Ziiatkerlik mektepteri derbes bilim berý uiymy ekenin, sondyqtan oqý protsesi men ishki baqylaýǵa mekteptiń ózi jaýapty ekenin atap ótti.
Tekseris qorytyndysy boiynsha qyzmetkerdiń áreketine jáne mekteptegi ishki baqylaýdyń uiymdastyrylýyna tiisti baǵa beriledi.
Tekserý jumystary jalǵasyp jatyr.
