Keibir partiia oppozitsiia rólin oinaýǵa tyrysýda, biraq halyq oǵan senbeidi. Bul týraly belgili saiasatker, saiasat ǵylymdarynyń doktory, memleket jáne qoǵam qairatkeri Ermuhamet Ertisbaev Azattyq Rýhy agenttigine suhbatynda aitty, dep habarlaidy «Aiqyn» gazeti.
Prezident Qasym-Jomart Toqaev qoiǵan mindetke sáikes, biylǵy jazda «Parlamenttik oppozitsiiaǵa» qatysty zań qabyldandy. Qujatta oppozitsiia úshin birqatar artyqshylyqtar qarastyrylǵan. Osyndai mártebege ie fraktsiia ókilderine árbir parlamenttik tyńdaý men úkimet saǵatynda, palatanyń jalpy otyrysynda, Májilis pen Senattyń birlesken otyrysynda mindetti túrde sóz beriledi. Olar Úkimettiń zań jobasyna balama jobany usyný quqyǵyna ie. Budan bólek, olardyń ókilderi komitet tóraǵalyǵyna usynylady.
Parlamenttik oppozitsiia mártebesin ielenýge birneshe partiia talasýda. Ásirese, «Aq jol» partiiasy belsendilik tanytyp keledi. Onyń jetekshisi A.Perýashev tipti birqatar ótkir málimdeme jasady.
«Men Azat Perýashevtiń ótkir málimdemesine jolyqqan kezde britandyq ataqty jazýshynyń esteligin eske túsiremin. Oǵan birde advokat tanysy qyzyqty qaǵidany aityp beredi: eger qorǵaýshy retinde sóz sóileseń, zań aiasynan aspa! Al eger sottan tys talasqa qatyssań, ái-sháiǵa qaramai, aqyryp, aiǵaila, ústeldi toqpaqta! Bul árine, kúlkińdi keltiretin kórinis. Batyryp-batyryp sóileýge tyrysqanda Azat Perýashev sol advokatty kózge elestetedi», – dedi Ermuhamet Qabidenuly.
«Mynany qarańyz: Azat Turlybekuly parlamenttik respýblika qurý qajet dep málimdedi. Ol 2012 jyldan beri depýtat. Sonymen birge 20 jyldan astam ýaqyttan beri – biliktiń adamy. Azamattyq partiiany basqardy. Sondyqtan ol oppozitsioner rólin oinaǵysy kelgenimen, oǵan eshkim senbeidi. Ol naqty oilastyrylǵan, qyzyqty baǵdarlama túzýi qajet edi. Ondai baǵdarlamasy joq. Ol óz partiiasyn – biznes pen kásipkerlerdiń qorǵany retinde kórsetýge bar kúshin salyp baǵýda. Biraq onysynan da eshteńe shyǵar emes. Mysaly, Nur Otan partiiasyn alaiyq: onyń partiialyq tizimindegi kandidattardyń 30%-y – kásipkerler!» – dedi E.Ertisbaev.
Onyń bailamynsha, Ýkraina nemese Belarýsten bir aiyrmashylyǵy, Qazaqstanda biznesmender bilikke qarsy kelgisi kelmeidi, olarǵa elde turaqtylyqtyń bolǵany kerek. Turaqtylyq bolmasa, tártipsizdik oryn alyp, biznesi tý-talaqai etiledi.
«Onyń ústine «Aq joldyń» «Adal» partiiasy beinesinde básekelesi paida boldy: bular ózderiniń jalǵyz elektoratyn jan-jaqqa julmalap jatyr. Ekeýi de Nur Otan-men teń dárejede básekelese almaidy. Óitkeni bizdiń partiiany júzdegen myń jeke sharýashylyq sýbektileri qoldaidy. Olardyń bári kóshbasshy partiiaǵa daýys berýge daiyn otyr. Bul jerde mynany umytpaýǵa tiispiz: Nur Otan árbir óńirde, barlyq qala men aýdanda filialyn qurýmen ǵana shektelmei, biznes nysandarynda, kásiporyndarda bastaýysh uiymdaryn ashqan jalǵyz partiia! Demek, barlyǵy qamtylǵan, baqylaýda. Filialdar men bastaýysh uiymdar kún saiyn ideologiialyq jumys júrgizedi. Osyndai jaǵdaida A.Perýashev ótkir málimdemeler jasaidy, al onysy esh áser etpeidi, nátijege jetpeidi», – dep sanaidy saiasatker.
Onyń pikirinshe, «Aq jol» narazy elektorat ózine daýys beredi dep úmittenetin bolsa kerek.
«Bul rette 20 jylǵa sottalǵan qashqyn bankir «Aq joldy» qoldaýǵa sheshim qabyldapty. Bul endi printsipsizdiktiń jarqyn kórinisi. Nur Otan-nan basqa kez kelgen partiiaǵa daýys ber degen ne, mysaly?! Mundai ustanym eldi damýǵa bastamaidy. Aitpaqshy, jaqynda «Zertteý» qory halyq arasynda saýalnama júrgizdi. Qazan aiynda «Qoǵamdyq pikir» suraý salǵanda, kóshbasshy partiiany qoldaýshylar sany 72,1 paiyz bolǵan. Endi sailaýshylardyń 74,5%-daiy Nur Otan-ǵa daýys beretinin aityp otyr. Mine, qazirgi kezdegi jaǵdai osyndai», – dep túidi Ermuhamet Ertisbaev.
