Qazaqstan OPEK+tiń munai óndirisin qysqartý jónindegi kelisimin qoldady, dep habarlady energetika ministrliginiń baspasóz qyzmeti.
12 sáýirde beinekonferentsiia arqyly ótken OPEK+ elderiniń kelissózi nátijesinde munai óndirisin táýligine 9,7 mln barrelge qysqartýǵa ýaǵdalasqany belgili boldy.
"Beinekonferentsiia barysynda energetika ministri Nurlan Noǵaev Qazaqstan burynǵydai syndarly dialogty qoldaityndyǵyn jáne álemdik naryqtaǵy qiyn jaǵdaidy eskere otyryp, munai óndirisin ujymdyq qysqartýǵa qatysýǵa daiyn ekenin aitty", – delingen habarlamada.
Energetika ministrligi ókilderiniń málimdeýinshe, OPEK+-ke múshe elderdiń, sondai-aq OPEK+-ten tys elder ministrleriniń vebinarynan keiin, 1 mamyrdan bastap eki aidyń ishinde táýligine 9,7 mln barrelge munai óndirisin qysqartý týraly kelisimine qol qoiylǵan.
"Qazaqstan óz kezeginde kelissóz nátijesinde qabyldanǵan sheshimdi qoldady", – dedi ministrlik ókilderi.
Al OPEK-tiń baspasóz qyzmeti: "OPEK+ elderi jeksenbidegi kezdesýde munai óndirýdi azaitýǵa kelisti jáne odaqtas emes iri óndirýshilerdi munai naryǵyn turaqtandyrýǵa baǵyttalǵan kúsh-jigerge tiisti jáne ýaqtyly úles qosýǵa shaqyrady", – dep habarlady.
Sonymen, mamyr-maýsym ailarynda OPEK+ elderi munai óndirýdi táýligine 9,7 million barrelge, shildeden 2020 jyldyń sońyna deiin táýligine 7,7 million barrelge, al 2022 jyldyń mamyryna deiin kúnine 5,7 million barrelge qysqartady.
Londondaǵy ICE birjasynda Brent markaly munaidyń jetkizilim fiýchersiniń baǵasy dúisenbide 4,4%-ke, barreline 32,85 dollarǵa deiin ósti.
WTI markaly munai fiýchersiniń baǵasy 6,8%-ke ósip, barreli úshin 24,31 dollardy qurady.
