Qostanai oblysynyń ákimi Arhimed Muhambetov "diirmenniń ónimdiligin artyq kórsetýge" qatysty videoǵa túsinikteme berdi, dep habarlaidy Sputnik Qazaqstan.
Aita keteiik, 27 qarashada YouTube jelisinde Arhimed Muhambetovtyń kostiým kigen adamdardyń arasynda turyp sóilegen videosy taraǵan bolatyn. Sondaǵy aqparatqa sáikes, video "Best Qostanai" JShS-ine qarasty oblystaǵy eń úlken diirmenniń janynda túsirilgen. Al Arhimed Muhambetov úkimet basshysynyń sapary aiasynda kásipkerlerge "tapsyrma" berip, diirmenniń ónimdiligin artyq kórsetýge usynys jasaǵan-mys.
"...Bul elimizdegi eń úlken diirmen, ónimdiligi – 1200. Solai dep aityńdar, 600-700 degendi eshkim aitpaidy. Ony kim ólsheidi? Durys pa?", - deidi oblys basshysy.
Búgin Ortalyq kommýnikatsiialar qyzmetinde ótken baspasóz máslihatynda Arhimed Muhambetov osy sózine túsinikteme berdi. Onyń aitýynsha, video shynymen de "Best Qostanai" JShS-ine qarasty eń úlken diirmenniń janynda túsirilgen.
"Astyqtyń azaiýyna bailanysty men úlken jiyn ótkizdim. Iri kásiporyndardy araladym. Sóitip, "Best Qostanaiǵa" da bardyq, diirmenniń ónimdiligi týraly sóilestik. Olar kúnine 700 tonna óndiremiz dedi. Men "Sizderde 1200 tonna emes pe? Nege jasyrasyzdar? " dep suradym. Osylai da osylai, tekseris kóp dedi, anaý-mynaý. Sodan men "Sizderdi kim tekseredi? Ony kim ólsheidi? " dep aittym. Sol sózimdi konteksten julyp alǵan ǵoi", - dedi Muhambetov.
Ákim jinalystar kezinde videoǵa túsirýge tyiym salmaitynyn da jetkizdi. Sol kúni de eshkimge tosqaýyl bolmaǵan. Videoǵa túsirgen adamǵa da shara qoldanbadym deidi.
"Ol adam arty solai bolatynyn bilmegen. Men diirmenderdi qarashanyń basynda araladym. Úkimet delegatsiiasy, shamamen, 20 kúnnen keiin keldi. Ózim sol rolikti kórdim. YouTube jelisinde eki aptadan artyq ýaqyt turdy. Eshkim qoldanǵan joq. Artynan úkimet delegatsiiasy keledi degennen keiin basqasha ainaldyryp jiberdi. Al videoǵa túsirgen adam keshirim surady. Men bárin túsinemin, sotqa da júgingen joqpyn", - dep atap kórsetti Muhambetov.
