Foto: Túrkistan oblysy ákimdigi
Óńirde «Qonys aýdarý» jármeńkesi jalǵasyp jatyr. Soltústik óńirden kelgen sala mamandary búgin Túlkibas, Ordabasy, Sairam, Báidibek aýdandarynyń turǵyndarymen kezdesti.
Túlkibas aýdandyq Mádeniet úiinde eńbek kúshin qajet etetin Soltústik óńirlerge halqy tyǵyz ornalasqan Ońtústik aimaqtarynan azamattardy erikti túrde kóshirý jumystary boiynsha turǵyndarmen kezdesý uiymdastyryldy.
Delegatsiia qatarynda Pavlodar oblysynan kelgen «Eńbek mobildiligi ortalyǵy» KMM-niń direktory Merýert Esembaeva, Ýspen aýdandyq «Mansap» ortalyǵy filialynyń direktory Serik Makataev, Aqtoǵai aýdany ákimdiginiń «Jumyspen qamtý jáne áleýmettik baǵdarlamalar bólimi» KMM-niń basshysy Qolqanat Neǵmetýlla, Efremov aýyldyq okrýginiń ákimi Saparjan Gapý jáne Soltústik Qazaqstan oblysy Mamliýt aýdandyq «Mansap» ortalyǵy filialynyń direktory Erkin Samarhanuly, Ǵ.Músirepov aýdany ákimdiginiń «Jumyspen qamtý jáne áleýmettik baǵdarlamalar bólimi» KMM-niń basshysynyń orynbasary Baian Shegebaev bar.
«Qonys aýdarý» jármeńkesinde Pavlodar oblystyq «Eńbek mobildiligi ortalyǵy» KMM-niń direktory Merýert Esembaeva Soltústikke qajetti jumys kúsh qataryn tolyqtyrý jumystaryn nasihattasa, Soltústik Qazaqstan oblystyq Mamliýt aýdandyq «Mansap» ortalyǵy filialynyń direktory Erkin Samarhanuly qonys aýdarýshylar jaiynda beinerolikterdi kórsetti. Sondai-aq, ózge de sala mamandary túlkibastyqtardy soltústik óńirlerge qonystanyp, jumysqa ornalasýǵa shaqyrdy.
Is sharaǵa 250 adam qatysty. Onyń ishinde qonys aýdarýǵa keńes alǵandar sany 30 bolsa, kóshýge 8 otbasy niet bildirdi. Jalpy, memleket Soltústik oblystarǵa qonys aýdarǵandardyń otbasy múshelerine bir ret 70 AEK (258 440 teńge) mólsherinde aqsha, alǵashqy ýaqytta úi jaldaýǵa qarjy beredi. Budan bólek, qysqa ýaqytqa kásibi oqýǵa jiberip, jumysqa ornalastyrýy jáne jeńildikpen baspana alýǵa kómektesýi tiis. Al qonys aýdarǵandarǵa jumys usynǵan jumys berýshilerge 400 AEK (1 476 800 teńge) sýbsidiia beriledi.
Kezdesý sońynda turǵyndar qonys aýdarý boiynsha keńes alyp, ózderin tolǵandyrǵan suraqtaryna jaýap aldy. «Qonys aýdarý» jármeńkesi óńirdegi Ordabasy, Sairam, Báidibek aýdandarynda da ótti. Onda da Soltústik óńirdegi aýyl aimaqtyń tirshiligi jóninde keń kólemdi málimet bergen sala mamandary, kópshilikti jumys kúshi az aimaqqa qonys aýdarýǵa shaqyrdy.
Aita keteiik, 2015 jyldan bergi kórsetkishterge sáikes, jumys kúshi az Soltústik óńirlerge Ońtústik aimaqtardan jalpy sany 14 874 adam qonys aýdarǵan.
Eske salsaq, budan buryn nasihat toby Maqtaaral, Saryaǵash, Keles, Qazyǵurt aýdandarynyń turǵyndarymen de kezdesken bolatyn.
