Keiingi jyldary Soltústik Qazaqstan, Pavlodar jáne Qostanai oblystarynda halyq sany azaidy. Bul týraly Senatta demografiialyq ósý taqyrybyna arnalǵan Úkimet saǵatynda palata tóraǵasy Máýlen Áshimbaev aitty, dep habarlaidy "Ult aqparat" "QazAqparat" Halyqaralyq agenttigine silteme jasap.
Máýlen Áshimbaevtyń aitýynsha, «Aýyldyq densaýlyq saqtaýdy jańǵyrtý» ulttyq jobasy aiasynda tiisti jumystar júrgizilip jatyr. Alaida jekelegen óńirlerde qarajattyń ýaqytyly igerilmeý faktileri baiqalady.
"Osyǵan bailanysty Ulttyq jobaǵa, Aýyldyq aýmaqtardy damytý tujyrymdamasyna jáne óńirlik damýdyń basqa da josparlaryna engizilgen is-sharalardyń sapaly júzege asyrylýyn qamtamasyz etý qajet. Keibir óńirlerde áleýmettik-demografiialyq jáne ekonomikalyq teńgerimsizdiktiń saqtalýyn da syn-qaterlerdiń biri retinde atap ótken jón. Búginde ońtústik, batys aimaqtarda jáne megapolisterde halyq sany aitarlyqtai ósip kele jatyr. Al, soltústik aimaqtarda, kerisinshe, azaiý úrdisi baiqaldy", - dedi M. Áshimbaev.
Onyń aitýynsha, keiingi jyldary Soltústik Qazaqstan, Pavlodar jáne Qostanai oblystarynda halyq sany azaiǵan.
«Bul rette ońtústikten soltústikke erikti túrde qonys aýdarý baǵdarlamasy kútilgen nátijeni bermegenin moiyndaýymyz kerek. Osy oraida qazir Senatta qaralyp jatqan Kóshi-qon týraly jańa zań eńbek resýrstarynyń mobildiligin arttyrý úshin jańa yntalandyrý sharalaryn qarastyrady dep senemiz. Sonymen qatar osy baǵytta basqa da is-sharalardy júzege asyrýymyz qajet. Demografiialyq jaǵdaidy eskere otyryp, áleýmettik, transporttyq jáne injenerlik infraqurylymnyń da tiisti deńgeide damýyn qamtamasyz etý kerek. Munamen qosa, azamattarymyzdyń jan-jaqty damýy úshin sapaly, ekologiialyq orta qalyptastyrý da mańyzdy is. Qazirgi kezde elimizdiń demografiialyq damýyna bailanysty osyndai máseleler boiynsha tiimdi vedomstvoaralyq is-qimyldy arttyrý qajet», - dedi Senat tóraǵasy.
