Ońtústik Qazaqstan oblysynan 36 otbasy Soltústikke jolǵa shyqty, dep habarlaidy «Ult aqparat» OQO ákiminiń baspasóz qyzmetine silteme jasap.
Olardyń ishinde ázirge eki otbasy Aqtoǵai aýdanyna qonys aýdarýǵa barsa, qalǵandary ondaǵy jaǵdaimen tanysyp, múmkindikterdi qarastyryp almaq niette. Saryaǵash aýdany Abai aýlynyń turǵyny Seidaly Áshirbaev osydan bir ai buryn atalǵan aýdanǵa baryp, ondaǵy tynys-tirshilikti kózben kórip qaitypty. Turǵynnyń aitýynsha, aýdan aýyl sharýashylyǵyn damytýǵa suranyp tur. Endigi jerde ol qolaily aýa raiy men qunarly jerdi, saqadai sai tehnikalardy paidalanyp egin egýdi josparlap otyr.
Soltústikke bet burǵan azamattardy oblystyq jumyspen qamtýdy úilestirý jáne áleýmettik baǵdarlamalar basqarmasynyń basshysy Muhit Otarshiev bastaǵan top shyǵaryp saldy. Basqarma basshysynyń aitýynsha, biylǵy jyly 113 otbasy soltústikke kóshken. Oblys turǵyndary elimizdiń jumys kózi kóp aimaqtaryna qonys aýdarý sharasy aiasynda otbasylar soltústiktiń Aiyrtaý, Aqjar, Jumabaev, Esil jáne Ýálihanov aýdandaryna baryp qonystanady. Tańdalǵan Pavlodar, Qostanai, Soltústik jáne Shyǵys Qazaqsan oblystaryna kóship barǵandardyń ishinde kúngei jurtynyń úlesi basym deidi basqarma mamandary. Olardyń deni sonda aýyl sharýashylyǵyn salasyn túletip otyr.
Aita keteiik, oblystan Soltústik aimaqqa kóshýge niet bildirgender sany kóbeiip keledi. Salaǵa jaýaptylar qonys aýdarǵan azamattar aldymen baspanamen qamtylyp, jumysqa ornalastyrylady deidi. Biyl qonys aýdarǵan otbasynyń árbir múshesine ailyq eseptik kóleminde, iaǵni shamamen 80 myń teńge bir rettik kómek beriledi. Sonymen qatar, bir jylǵa deiin turatyn úidiń jaldaý aqysy men kommýnaldyq tólemderi óteletin bolady.
