Ońtústik Qazaqstan oblysynyń sharýalary osy jyldyń toǵyz aiynda Resei, Belarýs, Qyrǵyzstan, Latviia, Litva, Estoniia jáne Germaniiaǵa 225 myń tonnadan astam qaýyn, 148 myń tonna qarbyz, 14 myń tonnaǵa jýyq júzim, 43 myń tonna shamasynda qyryqqabat eksporttaǵan, dep habarlaidy QazAqparat oblys ákimdiginiń baspasóz qyzmetine silteme jasap.
Sonymen birge, óńir sharýalary kókónis pen baqshadan basqa bul elderge úndik eti, sýsyndar men iri qara malǵa arnalǵan azyq pen balyq konservilerin shyǵaryp keledi.
Sońǵy ýaqytta oblysta qarqyndy baý sharýashylyǵyn damytý jáne jańa tehnologiialardy qoldanýdyń arqasynda baqsha ónimderiniń kólemi artty. Osynyń nátijesinde, jemis importynyń úlesi 99,3 mln dollarǵa nemese 33,3 paiyzǵa, al kókónis 6,2 mln dollarǵa nemese 4,8 tómendegen.
Jalpy Ońtústik Qazaqstanda 21 kásiporyn óz ónimderin shet el asyryp, eksporttaidy. Aimaqtyń kásipkerleri Ózbekstan, Qyrǵyzstan, Aýǵanstan jáne Tájikstanǵa ósimdik maiy men un, balyq súbesi men konservilengen balyq, qus jumyrtqasyn, makaron, konditerlik ónimderdi, qoi etin jáne siyr etin shet el naryǵyna saýdalaýda.
Agrarly aimaqtyń sharýalary kókónispen qatar dándi daqyldardy da eksporttaýǵa erekshe basymdyq berip keledi. Máselen, jyl basynan beri shet memleketterge quny 17,6 mln dollardy quraityn bidai men 49,3 mln dollarǵa un ónimderi eksporttalǵan. Jalpy aýyl sharýashylyǵy eksportynyń kólemi búgingi tańda 211,4 mln AQSh dollaryn qurap, ótken jylmen salystyrǵanda 6 paiyzǵa ósken. Al import kólemi 320 mln AQSh dollaryn qurap, 4 paiyzǵa kemigen.
Biyl Ońtústik Qazaqstan oblysynyń diqandary 376,5 mlrd teńgeni quraityn aýyl sharýashylyǵy ónimin óndirdi. Bul ótken jylǵymen salystyrǵanda 57 mlrd teńgege kóp. Iaǵni, diqandar biyl 400 myń tonnaǵa jýyq astyqty qambaǵa quisa, 116 myń tonna jemis-jidek pen 919 myń tonna kókónis, 295 myń tonna kartop, 1,3 mln tonna baqsha daqyldaryn jinady.
