Búgin Ońtústik Qazaqstan oblysynyń ákimi Janseiit Túimebaevtyń tóraǵalyǵymen aýdan, qala ákimderimen jáne oblystyq basqarmalar basshylarynyń qatysýymen selektorlyq májilis ótti. Kún tártibinde «Oblysta energoúnemdeý jáne energotiimdilikti arttyrý jumystarynyń barysy» men «Oblys aýmaǵyndaǵy eldi mekenderdi abattandyrý, kógaldandyrý jáne sanitarlyq tazalyq sharalary» týraly eki másele qaraldy, dep habarlaidy "Ult aqparat" ákimniń baspaózs qyzmetine silteme jasap.
Kún tártibindegi máselege kóshpes buryn óńir basshysy barsha aýdan, qala ákimderi men basqarma basshylaryna búgingi altynshy shaqyrylǵan Parlamenttiń úshinshi sessiiasynda sóilegen Elbasy Nursultan Nazarbaevtyń baiandamasymen tanysyp, qoiylǵan mindetter boiynsha naqty josparlar jasaýdy tapsyrdy.
Jańa oqý jylynyń bastalǵanyn aitqan aimaq basshysy bilim berý mazmunyna, oqýshy men pedagog tulǵasyna jáne qyzmetine basa nazar aýdarý qajettigin aitty. Sonymen qatar, oblystaǵy muǵalimderdi qyzmettik pátermen qamtý úshin barlyq aýdan,qalalardan tiptik úlgidegi turǵyn úiler salýdy qolǵa alý kerektigin atap ótti. Bul baǵyttaǵy jumystardy úilestirýdi qurylys basqarmasyna júktedi.
Kún tártibindegi birinshi másele boiynsha baiandama jasaǵan oblystyq energetika jáne turǵyn úi-kommýnaldyq sharýashylyǵy basqarmasynyń basshysy Marǵulan Maraiym óńirde energo aýdit júrgizý isi kesheýildep otyrǵandyǵyn aitty. Onyń aitýynsha, oblysta 103 nysannyń tek 48-ne ǵana energo aýdit júrgizilgen. Iaǵni, 55 mekemede búgingi kúnge deiin energo aýdit júrgizilmei, «Energiia únemdeý jáne energiia tiimdiligin arttyrý týraly» zań talaptary óz deńgeiinde oryndalmai otyr.
Osy máselege mán bergen oblys ákimi aýdit júrgizý jónindegi tiisti jumystardy aǵymdaǵy jyldyń sońyna deiin atqarýdy tapsyrdy.
«Shymkent qalasynda balamaly kózderdi (kún sáýlesinen) paidalana otyryp, elektr qýaty men tabiǵi gazdy únemdeý úshin kópqabatty turǵyn úilerge sý jylytý qurylǵylary ornatylýyn tapsyramyn. Tapsyrmany qatań baqylaýda ustaý qajet», - dedi Janseiit Qanseiituly.
Májiliste sondai-aq oblys aýmaǵyndaǵy eldi mekenderdi abattandyrý, kógaldandyrý jáne sanitarlyq tazalyq sharalary talqylandy. Bul rette oblys ákiminiń kórshiles oblystar men sheteldiń oń tájiribesin qoldanysqa engizý jónindegi tapsyrmasynyń oryndalý barysy sóz boldy. Desek te, kósheni tazalaý, bei bereket kúl-qoqystardy joiý jáne úi qasbetterin ákteý, syrlaý boiynsha tapsyrmalardyń oryndalýy baiaý. Atap aitqanda, kóshe boilaryn tazalaý boiynsha jospar Shymkent qalasynda – 30 paiyzǵa, Otyrarda – 31, Ordabasyda – 38, Maqtaaralda– 40, Arysta – 42, Shardara aýdanynda 49 paiyzǵa ǵana oryndalǵan.
Tazalyqty qamtamasyz etý jóninde Shymkent qalasy ákiminiń orynbasary Beisen Janbosynovqa syn eskertpeler aitylyp, birqatar tapsyrmalar júkteldi.
«Búginde Shymkent qalasynda tazalyqty qamtamasyz etetin 3 mekeme bar, onda bir myń adam jumys isteidi jáne 203 tehnika bar. Alaida osyǵan qaramastan tazalyqty qamtamasyz etý jumystary kóńil kónshitpeidi. Bul jaǵdai oblys ortalyǵy úshin óte uiat. Tiisti qorytyndy shyǵaryńyzdar»,-dedi ákim.
Májilisti qorytyndylaǵan óńir basshysy oblys boiynsha kondominiým men páter ieleriniń kooperativterin qurý jumystaryn jedeldetip, otyrǵyzylǵan tal-daraqtardy kútip-baptaý máselelerine asa mán berýdi tapsyrdy.
