Ońtústik Qazaqstan oblysynda «Meniń Qazaqstanym» án baiqaýy óz máresine jetti. Sozaq aýdanynda ótken óner dodasyna 100-ge jýyq úmitker qatysyp, aqtyq kezeńge 26 úmitker joldama alǵan bolatyn, dep habarlaidy «QazAqparat» tilshisi.
Elbasynyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý maqsatynda jáne Ońtústik Qazaqstan oblysynyń 85 jyldyǵyna arnap uiymdastyrylǵan óner saiysy biyl Teriskei jerinde ótti. Sazger Shámshi Qaldaiaqovtyń shyǵarmalaryn, onyń ishinde týǵan jerge arnalǵan patriottyq ánderin nasihattaý men jas talant ielerin anyqtaý maqsatyn tutqan baiqaýǵa aýdan, qalalar men oqý oryndarynan 15-29 jas aralyǵyndaǵy óner ieleri qatysty. Ánshilerdiń oryndaý sheberlikterin sarapqa salǵan qazylar alqasy bas júldeni shym shahardyń «Saryn» tobyna berse, birinshi orynǵa Sozaq aýdanynan Aqerke Jumasheva laiyq dep tanyldy. Ekinshi dárejedegi júldemen shardaralyq Qalamqas Qojanazarova marapattalsa, shymkenttik ánshi Áljan Nurlybek úshinshi oryndy iemdendi.
Al, Ońtústik Qazaqstan oblysynyń əkimi Janseiit Túimebaevtyń arnaiy júldesimen shymkenttik - «Arbat» toby, Sozaq aýdany ákiminiń arnaiy júldesimen Robert Jetkerbaev marapattaldy. Sonymen qatar, «Aqmańdailym» júldesi Maqtaral aýdanynan Malika Qaldybaiǵa, «Aqsuńqarym» júldesi Shymkent qalasynan qatysqan Sanat Álimhanovqa, «Bárinen de sen sulý» júldesi Sozaq aýdanynyń «Shabyt» kvintetine, "Eń jas oryndaýshy» júldesi Bəidibek aýdanynan kelgen Asan Sydyqovqa berildi.
Sozaq aýdandyq «Dostar» ortalyq stadionynda ótken jeńimpazdardy marapattaý rásiminen keiin, gala-kontsert ótti. Onda elimizge tanymal estrada ənshileri men Shámshi Qaldaiaqov atyndaǵy oblystyq filarmoniia men oblystyq opera jáne balet teatrynyń ónerpazdary, Súgir atyndaǵy qazaq ult-aspaptar orkestri, «Qazyna», «Tumar» bi ansamblderi jáne balet toby qatysyp, óner dýmanyn asqaqtatty.
