QR Memlekettik qyzmet isteri jáne sybailas jemqorlyqqa qarsy is-qimyl agenttiginiń Ońtústik Qazaqstan oblysy boiynsha departament basshysy Áli Kómekbaev "ońtústiktiń xalqy bir-birine aqsha berip úirengen" degen sózdi estigen.
Alaida ózi ondaiǵa jol bermeýge tyrysady. Sol sebepti ony "orys" dep ataidy, dep xabarlaidy QazAqparat tilshisi.
"Meniń týyp ósken jerim - Ońtústik Qazaqstan oblysy. Qara shańyraq sonda. Biraq 18 jyl boiy men osynda - Astanada jumys jasadym. Endi, ońtústikke qyzmet babymen baryp otyrmyn. Iá, "ońtústiktiń xalqy bir-birine aqsha berip úirengen, sóitip bir-birin baiytady" degendi men de estigenmin. Biraq ózim ony kórmeimin. Joq dep, taǵy aita almaimyn. Degenmen, "ondai júie qalyptasyp ketken" degen sózben kelispeimin. Maǵan da túrli áńgimeler túsedi. Ol jaqta meni "orys" dep aitady da. Óitkeni ondai qarym-qatynasqa jolamaimyn. Óitkeni men tárbiemdi osy agenttikte aldym. Osy ortalyq apparatta tárbiemdi alyp bardym. Maǵan adam keledi, kómektesshi dep suraidy. Men oǵan saitty kórsetem de, ishinde daiyndyq testeri bar deimin. Solai daiyndal deimin", - dedi Kómekbaev búgin Astanada ótken baspasóz máslixatynda.
Onyń aitýynsha, ońtústik óńirde birge oqyǵan jáne birge jumys istegen qatarlastary kóp. Keibir adamdar solar arqyly tanys-tamyrlastyq izdeidi eken. Alaida dostary qolyn bir siltep: "Odan nátije shyqpaidy. Ol "orys" bolyp ketken", - dep jaýap qaitaratyn kórinedi.
Aita keteiik, búgin elordada ótken baspasóz máslixatynda Á.Kómekbaev memkyzmet.kz atty qosymsha saittyń tanystyrylymyn ótkizdi. Atalǵan portalda memlekettik qyzmetkerler ǵana emes, memlekettik qyzmetke júginetin qarapaiym azamattar da qajetti aqparatty ala alady. Sonyń arqasynda jemqorlyq áreketterdiń aldyn alýǵa múmkindik bar. Budan bólek, departament basshylyǵy mektep direktorlaryn taǵaiyndaý boiynsha oblys ákimine tiisti usynystaryn engizýdi kózdeidi.
