Ońtústik Qazaqstan oblysynda óńirdiń qurylǵanyna jáne «aitystyń aqbereni» atanǵan aqyn Táýshen Ábýovanyń týǵanyna 85 jyl tolýyna orai aimaqtyq aqyndar aitysy ótti. Sóz maitalmandary elimizdiń birqatar óńirinen qatysty, dep habarlaidy "Ult aqparat".
Alaman aitys Elbasy Nursultan Nazarbaevtyń «Bolashaqqa baǵdar: rýhani jańǵyrý» baǵdarlamalyq maqalasy aiasynda Otyrar aýdany ákimdiginiń uiymdastyrýymen ótti. Sóz dúldilderiniń dodasy bastalmas buryn jinalǵan qaýym Táýshen aqynnyń ómiri men shyǵarmashylyǵynan syr shertetin kórmeni tamashalady.
Sýyryp salma aityskerlerdiń sóz dodasyna otyrarlyq Dáýren Aqsaqalov, Dáýren Polatbaev, báidibektik Qajymuqan Abzalov, Birjan Baitýov, sairamdyq Jandos Myrzabek, saryaǵashtyq Nurǵali Ánapiialarmen qatar, qaraǵandylyq Didar Qamiev, Botagóz Muhiddinqyzy, qyzylordalyq Móldir Aitbai, Jadyra Qazieva, batys qazaqstandyq Baýyrjan Shirmedinuly, jambyldyq Nurlybek Qurmanovtar qatysyp, aityssúier jurtshylyqqa sóz zergerligin tanytty.
Alaman aitysty Otyrar aýdanynyń əkimi Erlan Aitahanov pen oblystyq aqyn - improvizatorlar qaýymdastyǵynyń tóraǵasy Qabylbek Tóretai quttyqtaý sózben ashty. Qara dombyra kúmbiri, aqyndyqtyń shabytty syry tunǵan aitysta Təýshen Əbýovanyń məńgilik izi men úlgi-ónegesi, qasietti Otyrar aýdanynyń tarihi orny men búgingi jetistigi arqaý boldy.
Óleń qudiretiniń qupiiasy men qut uiasyn qanynda, qalamynda oinatqan, shalqar shabyt iesiniń esimin arqalaǵan aimaqtyq aqyndar aitysynda bas júldege qaraǵandylyq Didar Qamiev laiyq dep tanyldy. Al birinshi oryndy batysqazaqstandyq Baýyrjan Shirmedinuly ielendi. Otyrar aýdany ákiminiń arnaiy júldesin Qajymuhan Abzalov, ekinshi oryndy saryaǵashtyq Nurǵali Ánápiia jeńip aldy. Úshinshi oryndy otyrarlyq Dáýren Polatbaev ielense, «Nur Otan» partiiasy OQO boiynsha filialynyń arnaiy júldesi qyzylordalyq Móldir Aitbaiǵa buiyrdy. Oblystyq mádeniet basqarmasynyń syilyǵy qaraǵandylyq Botakóz Muhiddinge, Otyrar memlekettik arheologiialyq-qoryq mýzeiiniń alǵys haty men arnaiy sertifikaty jambyldyq Nurlybek Qurmanovqa berildi.
