Ońtústik Qazaqstan oblysynyń sportshysy 19 jastaǵy Qobylandy Orynbasarov Seýlde ótken gir tasyn kóterý sportynan álem chempiony atandy. Al, jattyqtyrýshysy Murat Serikbaev ardagerler arasyndaǵy jarysta álem chempionatynyń kúmis júldesin ielendi, dep habarlaidy "Ult aqparat".
Ońtústik Koreianyń astanasy Seýl qalasynda qarasha aiynyń 15-19 aralyǵynda ótken jarysqa álemniń 33 elinen 600-ge jýyq sportshy qatysqan bolatyn. Dodada 73 keli salmaq dárejesinde baq synaǵan Qobylandy, 32 keli gir tasyn uzyn tsikldy kóterýdi 62 ret baǵyndyrǵan. Jattyqtyrýshysy Murat Serikbaevtyń aitýynsha, Qobylandy alǵashqyda qazaq kúresimen ainalysqan eken.
«2014 - 2015 jyldar aralyǵynda Qobylandyǵa gir tasyn kóterýdiń qyr-syryn úirettim. Az ýaqytta úlken nátijeler kórsete bastady. Máselen, osy sportpen ainalysqan bir jyldyń ishinde jasóspirimder arasynda Qazaqstan Respýblikasynyń chempiony, sol jyly Latviiada ótken Eýropa chempiontynda kúmis júldege qol jetkizgen. Al, keler jyly Aqtóbe qalasynda jasóspirimder arasynda álem chempiony atandy. Biyl jastar arasyna da erkin kirip, el birinshiligin utty. Ózderińiz kýá bolyp otyrǵandai, jastar arasyndaǵy ulttyq quramaǵa múshe bolyp, Ońtústik Koreia memleketinde ótken álem chempionatynyń jeńimpazy boldy»,- deidi bapker Murat Serikbaev.
Al, bapkerdiń ózi bolsa 73 keli salmaq dárejesinde 24 kelini qossaiys boiynsha 131 ret kóterip kúmis júldeni alyp otyr.
Aita keteiik, jasóspirimder arasyndaǵy álem chempiony Sozaq sportynyń tól týmasy. Ońtústikten shyqqan jastar arasyndaǵy tuńǵysh álem chempiony Almaty qalasyndaǵy Qazaq týrizim jáne sport akademiiasynyń 3 kýrs stýdenti.
