Ońtústikqazaqstandyq kásipker 2 million teńgege EXPO-2017 kórmesiniń biletin satyp aldy, - dep habarlaidy "Ult aqparat" OQO ákiminiń baspasóz qyzmetine silteme jasap.
"Búginde oblys kóleminde EXPO-2017 halyqaralyq mamandandyrylǵan kórmesine daiyndyq jumystary jan-jaqty júrgizilýde. Sondai-aq, kórmeniń ótý kezeńinde Astana qalasyn azyq-túlik ónimderimen qamtamasyz etý maqsatynda aýyl sharýashylyǵy basqarmasy tiisti jumystardy atqaryp jatyr, - dep habarlady baspasóz qyzmetindegiler.
Ońtústik jurtshylyǵy qazirdiń ózinde biletterdi jappai satyp alýǵa kóshken. Onyń ishinde óńirdegi qaltaly azamattar óz qarjylaryna bilet alyp, áleýmettik turmysy tómen otbasylar men múgedekterge jáne de ardagerlerge syilyq retinde tartý etýde. Osyndai igi bastamany qolǵa alǵan azamattyń biri oblys depýtaty, túrkistandyq kásipker Rahym Táńirbergenov.
Belsendi azamat Shymkent qalasyndaǵy ál-Farabi alańynda EXPO-2017" halyqaralyq kórmesi men Elbasynyń "Bolashaqqa baǵdar: rýhani jańǵyrý" maqalasyna qoldaý bildirgen jastar men ulttyq aspaptar orkestriniń qatysýymen ótken sharaǵa qatysyp, elordada ótetin kórmege 2 million teńgege 500 biletti óz qarajatyna satyp alǵanyn aitty.
"EXPO-2017 kórmesine árbir azamat atsalysýy tiis dep esepteimin. Óitkeni bul óte mańyzdy shara. Elimizge álemniń 100-den astam memleketten qonaqtar kelgeli otyr. Sondyqtan osyndai aýqymy zor sharadan ońtústikqazaqstandyqtar da syrt qalmaýy tiis dep oilap, búgin óz qarajatyma 500 bilet satyp alyp otyrmyn. Bul biletterdi ózime qarasty mekemede eren eńbegimen kózge túsip júrgen azamattarǵa usynamyn. Sonymen qatar, jaz aiynda kórmege barý úshin arnaiy avtobýstar uiymdastyryp, túrkistandyqtardy óz esebimnen Astanaǵa aparyp qaitamyn", - dedi Rahym Kólbaiuly.
